Avokati Spartak Ngjela ka reaguar ashpër pas vendosjes së memorialit të viktimave të grushtit të shtetit ndaj Erdoganit, në Kodrën e Liqenit të Artificial të Tiranës.
Teksa i kërkon përgjigje Ramës për arsyen e ngritjes së këtij objekti, avokati Ngjela shprehet se nëse kreu i qeverisë refuzon të jap një shpjegim, atëherë pas përkujtimores fshihet një marrëveshje sekrete.
Përmes një postimi në rrjetet sociale, Ngjela theksoi se qeveria shqiptare është e detyruar t’i përgjigjet opinionit publik se çfarë është ky memorial turk fyes që vendoset në Tiranë se me çfarë të drejte Ambasada e Turqisë bën një marshim antishqiptar për shkak se Erdogani shpëtoi nga një grusht i supozuar shteti.
Reagimi i plotë i Spartak Ngjelës:
Ku e gjen të drejtën Ambasada e Turqisë për të bërë një marshim antishqiptar në Tiranë se na paska shpëtuar Erdogani nga një grusht shteti?
Ç’i duhet Shqipërisë dhe shqiptarëve është apo nuk është Erdogani në pushtet në Turqi! Shqiptarët as që duan t’ia dinë kë rrëzon Erdogani e kush kërkon ta rrëzojë Erdoganin.
Kryeministri Rama duhet të përgjigjet, në të kundër këtu ka një marrëveshje sekrete, e cila është krim shtetëror.
Deri tani shteti shqiptar nuk është përgjigjur. Ministria e Jashtme thotë “nuk di gjë”.
Po pse, çfarë është Shqipëria, një terra nullis, tokë e askujt?
Me që qeveria shqiptare nuk pranon të përgjigjet, sepse siç duket, e di veten një këshill mbretëror me fuqi absolute, është i detyruar t’i përgjigjet opinionit publik kryetari i Kuvendit të Shqipërisë: çfarë është ky memorial turk fyes për shqiptarët që vendoset në Tiranë?
Dhe të vendosë shkuljen e tij, sa më shpejt që të jetë e mundur.
