Është një histori me plot sakrifica dhe përpjekje. Fjalën e kemi për Alma Ajazi Bossuet, e cila në vitit 1999 doli Miss Shqipëria në Amerikë, ndërsa në vitin 2000 shoqëruesja e parë e Miss Albania. E bukur dhe plot sharm ish-Missi ditën e djeshme është rrëfyer në emisionin “Rudina” për të rrëfyer përpjekjet e pashtershme për të arritur ëndrrën e jetës. Prej vitesh ajo ka luftuar që të bëhet nënë dhe më në fund ja doli. Ish-Missi, Alma, prej vitesh jeton në Francë së bashku me bashkëshortin.
Që prej 2012-ës qëllimi i saj i jetës ishte të bëhej nënë, por nuk mund ta arrinte lehtë, pasi vuante nga një sindromë e rrallë, sindroma e vezoreve policistike. Një sëmundje e rrallë e femrave, e cila është një pengesë serioze për shtatzëninë, sepse krijon shumë ciste rreth vezoreve.
“Kjo është një temë shumë personale dhe, ndoshta, ka teleshikues që mund të mendojnë se këto tema nuk mund të ndahen me publikun, por unë zgjodha të mos e mbaj mbyllur me ҫelës, por ta diskutoj duke shpresuar se mund të jetë një burim shprese për ata që ndodhen në të tilla pozita…. Me këtë sindromë mund të bëhesh nënë, por por duhet t’u nënshtrohesh shumë kurave. Unë fillova në vitin 2012. Mora përsipër të krijoja një familje. Isha e ndërgjegjshme, por ishte e vështirë…”, u shpreh ish-Missi.
Më tej ajo tregon gjithë kalvarin e mundimeve derisa arriti të kishte në krahët e saj fëmijën. “Gjeta një gjinekolog privat dhe fillova kurat. Mjeku më tha që do kesh shumë pasoja. Mund të ndihesha e lodhur, e këputur, por unë isha e vendosur. Fillova me kokrrat për disa muaj, por kura nuk funksionoi. Pastaj filloi faza e dytë, e gjilpërave. Duhet të shpoja barkun ҫdo natë. Edhe këtë e pranova. Ishte një kurë që zgjati një vit”, tregon Alma. Sipas saj kjo ishte një terapi intensive e cila, natyrisht kishte edhe efekte anësore dhe nga 57 kilogramë ajo shkoi në 70 kg në pak muaj.
Por kjo ndikoi shumë në shëndetine ish-Missit. Pasi mjekët i bënë një skaner për të kuptuar nga se i kishte ardhur gjendja e të fikëtit, zbuluan se vezoret ishin zmadhuar dyfish dhe Alma kishte kaluar hemorragji të brendshme. “Pas operacionit të parë, mjekët më thanë se ishte i domosdoshëm edhe një operacion i dytë. Në atë moment mendova se isha drejt fundit dhe i them bashkëshortit vetëm “Je t’aime (të dua) dhe L’Albani (të më kthenin në Shqipëri për të më varrosur)…. Kur dola nga spitali, qëndrova dy muaj pa punë. Një ditë bashkëshorti më tha “stop”. Nuk dua të merresh më me këto kura. Mund të adoptojmë një fëmijë. Por unë i thashë “nuk e pranoj, që ky të jetë fati im.”, tregoi Alma.
Pas një viti me kura, Alma tregon se ishte e gatshme të rifillonte edhe një herë tjetër përpjekjet. Këtë herë, gjithҫka do të bëhej e mundur nga inseminimi artificial – një proces i thjeshtë pas mbarimit të kurave. Doktori vendos datën e evoluimit dhe pastaj realizon inseminimin…” Dita kur mësoi se kishte mbetur shtatzënë ishte dita më e lumtur për të dhe bashkëshortin. Më 31 dhjetor të vitit 2015 vjen në jetë Isabel, një vajzë bukuroshe me sytë e së ëmës, e cila tani është 16 muajshe. (J.V/Shuplaka)
