Shumë pak persona e dinë që në një qoshe afër “Shkollës së Kuqe” në Tiranë, ekziston një godinë e thjeshtë që mbledh ata që kanë nevojë për të ngrënë një pjatë gjellë të ngrohtë.
Quhet “Mensa Shërbimi i Dashurisë”. Kjo mensë iu shërben ushqim falas rreth 200 personave çdo të martë, të enjte dhe të shtunë nga një staf vullnetarësh, të Kishës Ortodokse Autoqefale të Shqipërisë.
Në kryeqytet ka një numër shumë të madh qytetarësh të cilët jetojnë në kushte mjeruese, që përpiqen të sigurojnë ushqimin e përditshëm për të mbijetuar.
Në këtë mensë ata gjejnë një ambient të pastër, mikpritës dhe një drekë të ngrohtë.
Vullnetarët e Kishës punojnë me përkushtim, duke i trajtuar të gjithë me respekt, dashuri dhe dinjitet.
Mbi të gjitha askush nuk pyetet se cilit besim i përket, sepse përpara zotit janë të gjithë të barabartë.
Në një video të publikuar në internet, mund të shikoni se sa ndihmë e madhe është kjo mensë për këta qytetarë.
“Jam pensionist, çfarë të bëj unë me aq pak lekë? Dikur ndërtoja hidrocentrale, pallate, sot na trajtojnë si kriminelë. Këtu vijnë të varfrit, unë jam pensionist, çfarë të bëj më 9 mijë lekë? Nga pamundësi vijmë këtu tre herë në javë”, tregon njëri nga ata, një pensionist.
Megjithatë, kjo mensë ka nevojë edhe për mbështetjen e bamirësve të tjerë.
“Edhe një kontribut sado i vogël, kur jepet nga të gjithë, ka një vlerë të madhe”, shprehet Dhjakon Nikolla i cili dëshiron që këtë vit të ri, mensa të shërbejë 7 ditë në javë.
“Ëndërroj që të shërbejmë 7 ditë në javë vitin tjetër. Më shumë bamirës do të thotë më shumë vaktë ushqimore për të varfrit”, janë fjalët e tij.
Ideator dhe mbështetës i mensës është Kryepeshkopi i Tiranës, Anastas Janullatos. Ajo funksionon që nga viti 2005. Mensa të tilla si kjo ka edhe në disa qytete të tjera të Shqipërisë. (D.D/Shuplaka)
Discussion about this post