Azdren Llullaku pritet të jetë një ndër lojtarët kuqezi më të kërkuar në merkaton e janarit. Sulmuesi kosovar aktualisht luan në kampionatin rumun me Gaz Metan, por nuk i përjashton mundësitë e largimit.
Në një prononcim për SuperSport, 28-vjeçari tregoi ofertat e marra nga ekipe të mëdha në Europë por dëshira e tij mbetet Italia.
“Kam kontratë deri në verën e ardhshme, por aty ekziston edhe një klauzolë, që nëse vijnë oferta të kënaqshme mund të largohem prej muajit dhjetor. Ka pasur interes, nga ekipe nga Rusia, por diçka po lëviz edhe nga Italia, apo edhe nga Ligat më të mëdha në Europë.
Dëshira ime është që të kem mundësi të luaj në Itali, aty ku jam rritur dhe ku jeton familja ime, megjithatë për momentin ende nuk ka diçka konkrete”, tha Llullaku për “SuperSport”.
Ndër të tjera kosovari foli dhe për aktivizmin e tij në Kombëtaren Shqiptare, ku tashmë është rikthyer nga De Biazi në ndeshjet e fundit të luajtura në kuadër të fazës në grupe për “Rusi 2018”.
“Dëshira ime më e madhe është të ndihmoj Kombëtaren me gola. Ndeshja me Izraelin ishte e çuditshme, sepse mbetëm në inferioritet pas vetëm 15 minutave, ndërsa u ndëshkuam edhe me penallti. Por, shpresoj që në ndeshjet që do të vijnë do të na ndryshoj fati, ndërsa unë ta ndihmoj Shqipërinë me gola.
Normale që pozicionimi në vendin e dytë në grup duket i vështirë, megjithatë i vështirë ishte edhe kualifikimi i Shqipërisë në Europian dhe ekipi ia doli. Kombëtarja ka kaluar shumë gjëra të vështira dhe në fund ia ka arritur aty ku e ka vendin. Unë kam shpresa deri në fund, për aq kohë sa matematika na e lejon që të pretendojmë për tu klasifikuar pse jo edhe në vendin e dytë ose të tretë”- përfundoi Llullaku.
