Merkel, e rreptë: “Të ndalohet burka në Gjermani.” Paralajmëron masa për refugjatët

Kancelarja gjermane Angela Merkel bëri thirrje që të ndalohet veshja e burkës në Gjermani dhe siguroi se do të mbështesë një ndalim mbarëkombëtar ndaj kësaj lloj shamie që mbulon fytyrën.

“Mbulimi i fytyrës në mënyrë të plotë duhet të ndalohet, kudo që ligjërisht është e mundur.”, është shprehur kancelarja gjatë një konference që partia CDU ka zhvilluar së fundmi.

Disa muaj më parë, Merkel u shpreh se burka pengonte gratë myslimane të integroheshin në shoqërinë gjermane.

Ky qëndrim i saj që u duartrokit nga të pranishmit vjen pas qëndrimit të Thomas de Maizière, ministri i Brendshëm gjerman, një ndër aleatët më të ngushtë të Merkelit, i cili deklaroi në Gusht se mbështeste propozimin e ndalimit të pjesshëm të kësaj veshje myslimane.

Gjatë fjalës së saj, kancelarja gjermane foli edhe për çështjen e emigrantëve, duke lënë të kuptohet se do të merren masa shtrënguese ndaj emigrantëve me qëllim mospërsëritjen e krizës së refugjatëve.

“Jo të gjithë emigrantët mund të qëndrojnë në Gjermani. Nevojitet që kriza të mos përsëritet.”, tha ndër të tjera Merkel. Qëndrimi i saj i mëparshëm ndaj krizës së azilkërkuesve shkaktoi përçarje brenda CDU-së (Christian Democratic Union) dhe rënie të numrit të atyre që e përkrahnin.