Në lidhje me debatin e ashpër që u zhvillua dje në studion e moderatores Eni Vasili, mes Artan Hoxhës dhe Sali Berishës, ka reaguar dhe një tjetër gazetar.
Mero Baze në një qëndrim të tij në ‘’Gazetën Tema” shkruan se moderatorët e studiove televizive ndihen inferior përballë Berishës.
Baze shprehet se halli i vetëm i tyre kthehet : Të bindin Sali Berishën që ta kenë në studio, pa nuk do të lejojnë njeri ta prekë.
Duke treguar eksperiencën e tij personale Baze shkruan se: Kështu më ka ndodhur mua dhe Andi Bushatit në Prill të vitit 2008, kur Fevziu na lajmëroi se nuk mund të ishim në emision me Berishën dy orë para se të fillonte, pasi ne “kishim hedhur baltë për Gërdecin”, ndërkohë në emision na sulmoi të dyve me fjalorin më të ulët, pa qenë aty.
“Moderatorja e emisionit nuk bëri asnjë përpjekje, qoftë dhe etike, ta ndalte ose t’i ndërpriste linjën e telefonit, por sillej sikur të dy akuzat ishin relative, d.m.th dhe kur i thoshte Sali Berisha “vrasës” Artan Hoxhës, ishte njësoj sikur i thoshte dhe Artan Hoxha, vrasës Sali Berishës, ndërkohë që ky i fundit, ja ka filmuar vrasjet live.
Nuk mjaftoi kjo por dhe duke mbyllur emisionin Sali Berisha e akuzoi sërisht Artan Hoxhën si pjesë e bandave dhe moderatorja ndërhyri si “negociatore” që do t’i pajtojë, t’i ul bashkë përsëri.
Unë nuk mendoj se Artan Hoxha ka nevojë për ndihmën time për ta mbrojtur, pasi u mbrojt shumë mirë vet.
Por inferioriteti i drejtuesve të emisioneve televizive ndaj Sali Berishës, dhe fakti që atij ja quajnë normale kërcënimet ndaj gazetarëve, tregon qartë për standardin e lirisë së shtypit që ai ka fiksuar në mendjen e tyre, si njeri që ka të drejtë të vrasë, të fyejë dhe të sulmojë, pa i kërkuar njeri llogari.
Bile dhe më keq akoma, në vend që ti zemëroj drejtuesit e emisioneve, u bën tu shkëlqejnë sytë kur u premton se mund të jetë përsëri në studion e tyre. Edhe si vrasës gazetarësh!”, shkruan ndër të tjera në shkrimin e tij Baze.
(E.K/FAXWEB)
http://www.gazetatema.net/2018/02/26/inferiore-perballe-berishes-te-rrepte-me-koleget-vrases/
