Dy policë kufitarë në Kakavijë kanë rënë në pranga, pasi akuzohen se merrnin ryshfet për të ndihmuar njerëzit për të kaluar kufirin.
Në kuadër të operacionit “Green border” u prangosën Timo Ciko dhe Bledar Duçka si dhe Shpëtim Brakaj.
Sipas burimeve zyrtare, SHÇBA kishte regjistruar një procedim penal prej disa muajsh, mbi bazën e informacioneve që kishte siguruar për kalimin e shtetasve shqiptare dhe të huaj, përmes kufirit të gjelbër drejt Greqisë në mënyrë ilegale. Pas një hetimi me metoda speciale u bë e mundur të identifikohej dhe dokumentohej ky aktivitet kriminal.
Ditën e sotme, strukturat e SHÇBA kanë arrestuar në flagrancë:
– Timo Ciko, 50 vjeç, shef i ruajtjes së kufirit të gjelbër, në Drejtorinë e Policisë Kufitare Gjirokastër;
– Bledar Duçka, 43 vjeç, trup shërbimi për kufirin e gjelbër, në Drejtorinë e Policisë Kufitare Gjirokastër;
– Shpëtim Brakaj, 41 vjeç, nga Fieri.
Gjatë arrestimit në flagrancë, të ndaluarve u janë sekuestruar një sasi euro, lekë, dollar, telefona celularë dhe 1 automjet.
Shtetasi Brakaj siguronte pagesat që varionin nga 300 deri në 400 euro për çdo person. Më tej policët kufitarë siguronin kushtet për të kaluar drejt vendit fqinj në mënyrë ilegale pa kryer procedurat ligjore.
Shtetasit që kalonin përmes pagesave tek rrjeti i dyshuar i trafikuesve, e kishin të pamundur të udhëtonin në zonën Shengen për shkak të problemeve me afatet e shkelura kohore, apo mos përmbushjen e kushteve të kalimit të lirë. Vijon ende hetimi për zbulimin e personave të tjerë të implikuar.
(FM/Faxweb)
