Ministria e Shëndetësisë ka pezulluar nga puna punonjësin me iniciale F. K. me detyrë laborant pranjë njësisë së Neuroradiologjisë, pas denoncimit të djeshëm në emisionin investigative “Stop”.
Laboranti merrte para për të siguruar kryerjen e rezonancës pa rradhë në spitalin shtetëror. Rasti i këtij pezullimi vjen pas atij të një dite më parë, ku Arben Beqiri pezulloi nga posti drejtoreshën e Qendrës Shëndetësore nr. 1 në Lushnje, e cila merrte pjesë në fushata elektorale.
Njoftimi i ministrisë së Shëndetësisë:
Drejtoria e Qendrës Spitalore Universitare “Nënë Tereza” Tiranë, njofton se pas transmetimit të një kronike denoncuese të një rasti korruptiv në media, ka pezulluar nga detyra punonjësin F.K me detyrën laborant pranë njësisë së Neuroradiologjisë në Shërbimin e Imazherisë dhe Mjekësisë Nukleare, pranë Polit të Administrimit të Integruar të Spitalit Polivalent, në bazë të proçedurave ligjore të parashikuara në Kodin e Punës dhe rregulloren e miratuar me Vendim nr.7 datë 21.09.2015 “Për miratimin e Rregullores së funksionimit të Q.S.U.T.” i Bordit Drejtues të Spitaleve Universitare.
Drejtoria e Q.S.U.T ka marrë kontakte për sqarimin e mëtejshëm të rrethanave dhe fakteve të ngjarjes me organet kompetente ligjore, të cilat po punojnë për zbardhjen e rastit, konform legjislacionit.
Gjithashtu Drejtoria e QSUT u bën thirrje dhe inkurajon të gjithë qytetarët që marrin shërbime mjekësore në QSUT, që të mos hezitojnë për të bashkëpunuar në raportimin dhe denoncimin e çdo rasti korruptiv, në cilindo nivel të shërbimit spitalor.
(XH.A/SHUPLAKA)
Discussion about this post