Prishja e Teatrit Kombëtar dhe projekti për ndërtimin e teatrit të ri, ka bërë që opinionisti Ergys Mërtiri ka reaguar në Facebook ndaj aktorit Erion Isai.
Ky i fundit është shprehur i revoltuar që aktorët që kundërshtojnë prishjen, u takuan me deputetë të opozitës, duke pretenduar se i japin ngjyra politike protestës.
Por Mërtiri ka reaguar duke i vënë në dukje aktorit paradoksin në veprimin e tij: Isai akuzon aktorët për politizim të protestës dhe vetë e shet kauzën duke “u ulur në prehërin e pushtetit”. Sipas Mërtirit, aktorë si Isai “nuk kishin për ta parë derën e teatrit pa përkrahjen e politikës”.
“Arsyeja pse unë kam hequr dorë nga protesta e Teatrit Kombëtar është sepse tashmë është kthyer në çështje politike. Dalin dhe flasin për një politikë të përgjithshme , marrin përsipër të flasin edhe për arkitekturë, janë bërë edhe arkitektë. Pastaj shkojnë dhe futen në zyrë të kryetarit të opozitës, gjë që mua nuk më duket normale. Unë nuk di që ndonjë nga 2 sindikatat të ketë kërkuar takim me kryeministrin dhe ai të ketë thënë jo” – u shpreh pak ditë më parë aktori Erion Isai.
Reagimi i plotë i Ergys Mërtirit:
“Pashë një lajm ku aktori Erion Isai qenka nxehur shumë se disa nga aktorët që po rezistojnë për të mbrojtur Teatrin u takuan me opozitën dhe për këtë arsye ai qenka distancuar nga protesta.
Pra, meqë disa nga kolegët e tij, duke parë që protesta po tradhëtohet dhe sabotohet në të katër anët, përpiqen ta mbrojnë duke kërkuar mbështetje kudo, edhe nga politika, Isai vendos të shesë kauzën dhe të strehohet në prehërin e pushtetit të qeverisë dhe oligarkëve! Për hir të një grimce të supozuar politizimi, Isai djeg gjithë jorganin dhe është gati të flejë me mullixhiun në gratacielat që mafia e betonit pret të ndërtojë mbi gërmadhat e teatrit!
Në fakt aktorucë estrade si zotëria në fjalë, nuk kishin për ta parë kurrë derën e teatrit pa përkrahjen e politikës. Ndërsa bëjnë si virgjëresha të depolitizimit për një kauzë kaq të rëndësishme për aktorët, janë pikërisht këta që kanë mbushur toën hall-et e fushatave elektorale të rilindjes duke u bërë gaztorë të oborrit qeveritar. Ndaj është turp që duan të njollosin kolegët e tyre duke i akuzuar se po e përdorin politikisht kauzën e tyre, ndersa aktorët që po rezistojne kanë marrë edhe kërcënime për heqje nga puna të familjarëve të tyre.
Aktorë dhe artistë të vërtetë janë ata që po rezistojnë aty për godinën e teatrit dhe ligjin që qeveria po bën për nënshtrimin e tyre. Ata që nuk janë në këtë rezistencë janë turpi i komunitetit të artistëve dhe shkaktarët përse ky pushtet mund të përdhunojë kulturën dhe artin si të dojë. Duke tradhëtuar këtë kauzë ata vetëm prostituojnë me profesionin e tyre duke shkelur mbi publikun që i duartroket.”
(E.L./Faxweb)
Discussion about this post