Ergys Mërtiri bën një analizë të shkurtër rreth seksizmit në Shqipëri, por të goditur për temën që sot është më aktuale se kurrë.
Mjafton konfirmimi se ”Seksizmi më banal sot gjendet në media”, për ta lexuar deri në fund atë që thotë analisti, duke i shtuar kësaj shqetësimin se shoqatat e grave në Shqipëri shqetësohen për diskriminimin e grave në familje dhe jo në media.
I PLOTË KËNDVËSHTRIMI:
Seksizmi më banal sot gjendet në media. Mjafton një vështrim në faqet e para të gazetave e portaleve për të konstatuar se njerëzit ndahen në burra dhe femra. Gratë thuajse nuk ekzistojnë në media. Veç kësaj, ato vdesin shumë herët nga vëmendja mediatike.
Fotot e burrave paraqesin personazhe përgjithësisht jo të pashëm, shpesh qerosë e me bark, të cilët shfaqen me shkrime e analiza, apo janë objekt i vëmendjes për shkak të veprimtarisë së tyre politike a kulturore. Fotot e grave, mbushin masivisht imazhet e rubrikave rozë, duke ekspozuar municionet fizike me qëllim tërheqjen e syrit perversiv mashkullor.
Burrat paraqiten përgjithësisht të veshur me kostum ndërsa femrat me bikini. Fotot e grave përdoren kryesisht jo si ilustrim i diçkaje, por si objekt në vetvete. Qëllimi i tyre përfundon tek vetë shfaqja, duke pasur të vetmin funksion përdorimin si dekor.
Burrat shfaqen për atë çfarë bëjnë, ndërsa gratë shfaqen për atë çfarë janë, më saktë, për dukjen e tyre. Gratë nuk kanë vlera të tjera përveç pamjes, në formën e saj më vulgare. Ato janë thjesht në shërbim të burrave, në funksionin më ordiner të nevojave mashkullore.
Ky është revolucioni feminist që solli media. I çliroi gratë nga familja dhe i robëroi ndaj industrisë së imazhit porno-gazetarik. Megjithatë shoqatat e grave në Shqipëri shqetësohen për diskriminimin e grave në familje dhe jo në media, interesohen për kuota të barabarta në politikë dhe jo për dinjitet të barabartë në mjetet e komunikimit publik!(V.G/SHUPLAKA)
