Mes dhimbjesh dhe lotësh i është dhënë ditën e sotme lamtumira edhe ushtarakut të dytë të Forcave të Armatosura, Klodian Tanushi, i cili humbi jetën pas plagëve të marra gjatë një misioni në Letoni. Major Tanushi u shpall dëshmor i atdheut dhe trupi i tij do të prehet në Varrezat e Dëshmorëve të Kombit, ku është përcjellë me nderimet më të larta.
Para ceremonisë mortore, prej më shumë se dy orë janë mbajtur në ambientet e Muzeut Kombëtar edhe homazhet shtetërore për nder të ushtarakut, ku krahas familjarëve të mbërthyer në lot dhe dhimbje, kanë qenë edhe 3 fëmijët e majorit, dy djemtë 14 dhe 11 vjeç, si dhe vajza e vogël 1 vjeç e gjysmë.
Kolegë të tij dhe pjesëtarë të Forcave të Armatosura kanë marrë pjesë në homazhe për t’i dhënë lamtumirën ish-ushtarakut Klodian Tanushi, ndërsa nuk ka munguar as rreshteri Julian Kapaj, i cili mbeti i plagosur në Letoni. Në homazhe ka qenë i pranishëm dhe Presidenti Ilir Meta, Kryeministri Rama, ministrja e Mbrojtjes, Olta Xhaçka, ministri i Brendshëm, Sandër Lleshaj, të cilët nuk i kanë mbajtur dot lotët. Ministrja Xhaçka ka premtuar mbështetje për 3 fëmijët e majorit.
Një mesazh për fëmijët e Tanushit ka përcjellë edhe Kryeministri Rama.
Për nderimin e Klodian Tanushit, 16 maji u shpall ditë zie kombëtare dhe të gjithë flamujt e vendit u ulën në gjysmë-shtizë, ndërsa në Parlament është mbajtur edhe një minutë heshtje.
Komandanti i kontingjentit shqiptar me misionin e NATO, u plagos më 6 maj pas shpërthimit të një mine në Letoni që i mori jetën edhe nëntetares Zarife Hasanaj dhe mbeti i plagosur rreshteri Julian Kapaj.
Discussion about this post