“Mësojmë me hell në dorë”, deputeti demokrat publikon fotografitë nga shkolla ku piqet mish në hell e hahet në klasë

Deputeti i Partisë Demokratike, Luçiano Boçi, ka vijuar me sulmet ndaj qeverisë dhe Ministrisë Arsimit.

Me anë të një postimi në rrjetet sociale, ka publikuar disa foto nga shkolla 9-vjeçare Zhepë, Skrapar, ku disa nxënës shfaqe me një berr të pjekur në hell, të cilin e hanë në ambientet e klasës, sikur të ishin në restorant.

Në postimin e publikuar nga Boçi thuhet: “SHKOLLA KU MISHI PIQET E … MINISTRIA NUK DIGJET

Deri më tani Ministrinë e Arsimit dhe drejtuesen e kam quajtur të paaftë dhe të papërgjegjshme.

Me sa duket qenkam gabuar!??

Fotot e mëposhtme të bëra në shkollën 9 vjeçare Zhepë, Skrapar ma “ndryshuan” tërësisht opinionin.

Ministria duket hapur këtu që është “gjeniale” dhe shumë “serioze”.
Shpikjet e saj nuk shterojnë asnjëherë.”

Më tej Boçi ironizon, nëdrsa shkruan se kjo është “nisma” mësojmë me hell në dorë.

““Mësojmë me hell në dorë” quhet kjo nisma më e re e Ministrisë, e cila shoqërohet me iniciativën e Qeverisë: “Ndalohet alkooli jashtë shkollave… e lejohet brenda”.”, shkruan Boçi.

Sipas tij, “Jemi në epokën e klasave digjitale pra, të Ramës e Linditës, “ku vlon mishi e rakia, tym e flakë të bëhet dija”.

Faktet ulërasin!
E nuk janë të vetmet.
Rrëfejnë saktë se si institucionet tona arsimore janë degraduar tashmë jo vetëm fizikisht, por dhe moralisht në pjesën dërmuese të tyre.”

Boçi shprehet se, “Tani në shkollat tona “të gjeneratës së re”, ndodh gjithçka.

Aty dhe shpërndahet “mall”, siç tregojnë shumë denoncime të nxënësve e prindërve, bëhen dhe mbledhje partie, por dhe njëkohësisht hahet e pihet qelepir e bëhet aheng për shtatë palë qejfe.

Shkolla së fundmi është dhe gjelltore dhe thertore dhe han me katër porta, ku vetëm mësim e edukim nuk ndodh të bëhet, ose rrallë bëhet.

Kjo është pamja reale e arsimit përtej fjalëve të stisura të Ramës e Linditës.
Rroftë Rilindja e … hellit në Arsim!”

(B.B/ Faxweb.al)