Kreu i Kuvendit Ilir Meta do të takohet me partitë parlamentare sot të orën në 19:00.
Ky vendim është marrë nga Meta pas takimit me ambasadorin Donald Lu, ambasadoren e BE-së, Romana Vlahutin dhe përfaqësuesin e OSBE-Së, Bernard Bochard. Mësohet se kjo mbledhje do të zhvillohet në ambintet e Kryesisë së Kuvendit.
Sipas burimeve në këtë takim pritet të diskutohet edhe për rekomandimet për Reformën Zgjedhore nga OSBE/ODIHR. Kjo lëvizje e Metës, vjen fill pas takimit që ai pati sot me trojkën e ambasadorëve të akredituar në Tiranë si edhe pas bashkëbisedimit, që po sot zhvilloi me kryeministrin, Edi Rama.
Takimi do të zhvillohet me dyer të mbyllura. Në këtë takim janë të ftuara të gjitha partitë politke në vend të cilat janë pjesë e parlamentit. PD, PS, PDIU, LSI, PR, PBDNJ këto janë partitë të cilat priten që të marrin pjesë në tryezën e Metës.
Pas kësaj thirrje Kreu i Partisë Demokratike, Lulzim Basha, ka thirrur në një mbledhje urgjente aleatët pas ftesës së kryeparlamentarit Ilir Meta, për një tryezë ndërpartiake. Takimi i Bashës me aleatët është parashikuar për t’u zhvilluar pasditen e sotme në orën 18:00, një orë para mbledhjes së thirrur nga Ilir Meta.
Mësohet se gjatë kësaj mbledhje Basha dhe aleatët e tij do të vendosin nëse PD do të marrë pjesë në tryezën e thirrur nga Meta, vendim të cilin do ta bëjë publik në përfundim të këtij takimi. (J.V/Shuplaka)
