Meta dhe Basha në inaugurimin e Donald Trump, Top-Channel: S’ka zyrtarë të ftuar

Asnjë zyrtar i huaj nuk është i ftuar në ceremoninë e betimi të presidentit të Shteteve të Bashkuara të Amerikës, Donald Trump.

Kështu pretendon Top Channel, televizion i cili pretendon se ka siguruar një dokument që u është dërguar selive diplomatike të akredituara në Uashington, nën siglën e Departamentit Amerikan të Shtetit.

“Si në të kaluarën, delegacione të huaja nuk do të ftohen në Uashington për këtë ngjarje. Shefat e misioneve diplomatike të vendosur në Uashington, së bashku me bashkëshortët/et, do të përfaqësojnë kryetarët e shteteve dhe qeveritë e tyre në ngjarjen kryesore të inaugurimit. Kjo ftesë nuk është e transferueshme”, thuhet në dokumentin në fjalë.

Sipas saj, veç ambasadores së Shqipërisë në SHBA, Floreta Faber, askush tjetër nuk është i ftuar.

Sipas Top-Channel, kanë dalë në treg bileta për ceremoninë e inaugurimit që shiten deri në 500 dollarë nga stafi i presidentit Donald Trump.  Kërkesa mbetet e lartë dhe rezulton se këto ftesa janë shitur shpejt.

Sot janë nisur drejt Washingtoni kreu i Kuvendit Ilir Meta dhe ai i opozitës Lulzim Basha, që të dy të ftuar në inaugurimin e presidentit të ri amerikan.

Bashkë me ta, në ceremoni merr pjesë edhe kryetari i Partisë Republikane Fatmir Mediu, ministri Blendi Klosi dhe deputeti socialist Ervin Bushati. Ndërsa nuk ka asnjë ftesë për kryeministrin Edi Rama, i cili gjatë zgjedhjeve presidenciale të 8 Nëntorit mbajti një qëndrim të ashpër ndaj Donald Trump.(A.R/SHUPLAKA)