Kryetari i Kuvendit, Ilir Meta i shoqëruar nga Kryetarja e Komisionit të Jashtëm, Arta Dade, u prit sot në Vjenë nga Presidentja e Këshillit Kombëtar të Austrisë, Doris Bures.
Në këtë takim Meta shprehu mirënjohjen për mbështetjen e vazhdueshme të Austrisë në avancimin e procesit të integrimit evropian të Shqipërisë dhe të vendeve të tjera të rajonit, dhe vuri në dukje se Shqipëria po punon për t’i ofruar më shumë argumente partnereve si Austria që janë avokate të fuqishëm. Po kështu u bisedua mbi ecurinë e procesit të reformimit të sistemit të drejtësisë ku Meta dhe Bures ndanë bindjen e përbashkët se progresi cilësor i kësaj reforme kyçe do t’i shërbejë ritmit të integrimit evropian, luftës me efikase ndaj korrupsionit, forcimit të shtetit ligjor dhe do të rrisë kredibilitetin e Shqipërisë në botë, veçanërisht në drejtim të investimeve të huaja.
Në fjalën e saj Presidentja e Këshillit Kombëtar të Austrisë vuri nëdukje sfidat me të cilat përballet hapësira evropiane. Ajo theksoi se Austria do t’a mbështesë gjithnjë Shqipërinë në integrimin e saj ne BE dhe në këtë kuadër u vlerësua roli i Austrisë në krijimin e Grupit të Miqve të Shqipërisë në Bruksel si dhe rëndësia e Procesit të Berlinit.
Ndërsa Meta vlerësoi gjithashtu edhe Strategjinë e Bashkëpunimit për Zhvillim të Përbashkët 2015-2020 e cila do të ndihmojë në fushat e arsimit profesional dhe mirëqeverisjes.
“Është një kënaqësi e madhe dhe kemi pasur mundësinë për të biseduar për lidhjet tona të shkëlqyeshme. Gjatë bisedës ne kemi folur edhe për perspektivën evropiane, që duhet të ketë Ballkani Perëndimor edhe Shqipëria. Edhe siç e dini, Austria përkrah gjithmonë afrimin e vendeve të Ballkanit Perëndimor edhe të Shqipërisë me Bashkimin Evropian. Kemi një bashkëpunim shumë të mirë edhe në organizatat ndërkombëtare edhe ne kemi thënë se edhe nivelin dypalësh do të vazhdojnë edhe në të ardhme këto lidhje të ngushta, jo vetëm midis qeverive, por edhe midis parlamenteve tona”, tha Presidentja e Këshillit Kombëtar të Austrisë, znj. Doris Bures.
“Dua t’ju falënderoj në veçanti për mbështetjen që i jepni Shqipërisë, por edhe rajonit tonë për t’u integruar plotësisht në Bashkimin Evropian në këto kohë plot sfida edhe për vetë unionin, por edhe për vetë Austrinë. Dhe njëkohësisht dua t’ju falënderoj në veçanti për mbështetjen aktive të Austrisë për reformën në drejtësi, ku Austria luan një rol mjaft aktiv edhe përmes misionin të Bashkimit Evropian, EURALIUS, në vendin tonë. Po kështu, mbështetja e Austrisë është mjaft e çmuar për strategjinë për bashkëpunim për zhvillim ekonomik të vendit tonë për vitet 2015-2020, ku prioritete mjaft të rëndësishme si arsimi profesional, decentralizimi dhe mirëqeverisja janë mjaft vitale për ecurinë e suksesshme të vendit në këtë rrugë. Një vlerësim të veçantë dua të bëj për presidencën austriake të OSBE-së edhe ne ndajmë të njëjtat prioritet si ato të presidencës austriake të OSBE-së lidhur me uljen dhe zbutjen e konflikteve, me bashkimin e forcave kundër radikalizmit dhe ekstremizmit të dhunshëm, por edhe me rivendosjen dhe rritjen e besimit për përballimin e sfidave mjaft të rëndësishme që ndeshet rajoni ynë dhe gjithë rajoni ku shtrihet OSBE-ja”, tha Meta. (J.V/Shuplaka)
Discussion about this post