Fill pas deklaratave të presidentit Meta se parlamenti që votoi kundër tij është legjitim, ka ardhur dhe reagimi i qeverisë Rama. Përmes zëdhënëses së qeverisë Elisa Spiropali PS deklaron se presidenti i takon Republikës e jo Lulit dhe Monikës.
Ministrja Spiropali në Twitter:
Zoti Meta, jemi dakord me ju “Shqipëria është Republikë. Presidenti i takon Republikës dhe Republika u takon qytetarëve!”. Pikërisht për sa jemi dakord këtu, ju e keni humbur të drejtën të qëndroni në zyrën e Presidentit. Sepse Presidenti i takon Republikës jo Lulit dhe Monikës.
Presidenti i vendit Ilir Meta ka bërë sot një tjetër deklaratë të fortë, kur tha se parlamenti i sotëm është jo legjitim. Duke iu referuar 100 votave që u panë dje në Kuvend kundër tij, Meta tha se presidenti është i Republikës, dhe Republika e qytetarëve.
Ndërkohë Meta theksoi edhe njëherë tjetër se dekreti i nënshkruar prej tij është i ligjshëm, dhe kushdo që e shkel atë do të përballet me pasojat. Kreu i shtetit u shpreh se institucioni që ai drejton po punon çdo ditë që palët politike të ulen në tavolinë dhe të vendosin një datë të re për zgjedhjet.
A e lexuar rezolutën e shumicës?
Meta: Presidenti është zgjedhur nga një parlament plotësisht legjitim, jo nga ky i sotmi. Besoj se jam shumë i qartë. Presidenti është Republikë, dhe Republika është e qytetarëve.
A do të ulni në tryezë zotin Rama dhe zotin Basha?
Meta: Sa më parë të jetë e mundur po punojmë me të gjithë, po mbahen shënim me shumë kujdes e të gjithë institucioneve që po shkelin ligjin.
Po nëse kolegji vendos për rrëzimin e dekretit tuaj, do ta pranonit këtë vendim?
Meta: Presidenti kërkon që të izolohet çdo i çmendur që shkel ligjin. Shqipëria ka nevojë për zgjedhje të lira, dekreti është në fuqi dhe i detyrueshëm për të gjithë, ne na lind e drejta që ti ftojmë të kthehen në rrugën e ligjshmërisë. Mund ta çoni dhe në gjykatën e Skraparit po të doni, po vendimin për dekretin e presidentit e merr vetëm Gjykata Kushtetuese.
(E.K/Faxweb.al)
