Maks Velo u shua sot në moshën 84-vjeçare, Meta: Zëri i Tij kritik do t’i mungojë në veçanti mbrojtjes së interesit publik

Presidenti i Republikës Ilir Meta ka reaguar me një status në Facebook në lidhje me ndarjen nga jeta të arkitektit të njohur Maks Velo.

Meta shkruan se zëri i tij kritik do t’i mungojë në veçanti mbrojtjes së interesit publik në këtë periudhë të brishtë institucionale dhe demokratike.

Velo ndërroi jetë sot në moshën 84-vjeçare pasi vuante prej kohësh nga një sëmundje.

Postimi i plotë

“Ndarja nga jeta e Maks Velos është një lajm i trishtueshëm.
Si një prej figurave më novatore të artit shqiptar, simbol i antikonformizmit dhe lirisë së mendimit, piktor e arkitekt i shquar që luftonte pakompromis transformimet e shfrenuara urbane, intelektual aktiv që jetoi dy epoka duke provuar vuajtjet e burgjeve të diktaturës, shkrimtar e studiues i njohur, kjo ikje e Tij le pas një boshllëk të pazëvendësueshëm në shoqërinë shqiptare.
Ngushëllime të afërmve, bashkëpunëtorëve, miqve e dashamirësve të shumtë!
Maks Velo dhe zëri i Tij kritik do t’i mungojë në veçanti mbrojtjes së interesit publik në këtë periudhë të brishtë institucionale dhe demokratike”.