Presidenti i Republikës Ilir Meta ka reaguar në lidhje me debatin për zgjedhjet në institucionet e arsimit të lartë.
Kujtojmë se ky proces hapi një debat mes ministrisë së arsimit dhe rektorateve në vend për mbajtjen e këtij procesi zgjedhor në këtë kohë pandemie. Ditën e djeshme rektori i Universitetit të Tiranës i ka dërguar edhe një letër Ministres së Arsimit Besa Shahini për anullimin e këtij procesi në këtë periudhë.
Deklarata e Metës:
“Lidhur me situatën e zgjedhjeve në universitet publike, Presidenti i Republikës Sh.T.Z Ilir Meta, thekson se ky është një proces tejet i rëndësishëm për të rinovuar autoritetet e reja dhe organet drejtuese të Institucioneve të Arsimit të Lartë në Shqipëri.
Ky proces i ri zgjedhor duhet të mishërojë parimet kushtetuese, të zhvillohet në përputhje me ligjin dhe aktet e tjera nënligjore dhe të jetë transparent e gjithëpërfshirës.
Ndaj, në kushtet specifike në të cilat ndodhemi, është shumë i rëndësishëm angazhimi dhe bashkëpunimi i të gjithë aktorëve dhe institucioneve që kanë përgjegjësi në këtë proces. Është detyrë e tyre të harmonizojnë të gjitha veprimet dhe aktet rregullatorë, në mënyrë që ky proces i ri zgjedhor të garantojë pavarësinë, autonominë, konkurrencën e lirë, transparencën dhe integritetin për të arritur një rezultat të gjithëpranuar dhe për të përmbushur objektivat e Arsimit të Lartë në Shqipëri”.
