Meta ftesë Presidentit të PE për vëzhgues në zgjedhje

Ilir Meta mësohet se i ka bërë një kërkesë zyrtare Presidentit të PE, Antonio Tajani për të dërguar  vëzhgues të zgjedhjeve të 18 qershorit.

Sipas Metës, monitorimi nga ana e PE i shërben cilësisë së procesit zgjedhor. Monitorimi sipas Metës do të bëjë që zgjedhjet të jenë më transparente.

Mësohet se Meta i ka bërë thirrje kreut të Parlamentit Europian për një grup vëzhguesish ndërkombëtarë nga Brukseli. Meta po ashtu ka shtuar se monitorimi i procesit i shton legjitimitetin rezultatit të zgjedhjeve.

Teksti i plotë i letrës:

Drejtuar: SH.T.Z. Antonio TAJANI

PRESIDENT

PARLAMENTI EVROPIAN

BRUKSEL

I nderuar Zoti President,

Më lejoni t’Ju informoj se më 18 qershor 2017 do të zhvillohen zgjedhjet për Kuvendin e Republikës së Shqipërisë.

Duke marrë në konsideratë angazhimin e autoriteteve të Republikës së Shqipërisë për të garantuar një proces zgjedhor të rregullt, transparent, demokratik e në përputhje me standardet më të larta bashkëkohore ndërkombëtare, kam kënaqësinë t’Ju përcjell ftesën në emër të Kuvendit të Shqipërisë për një grup vëzhguesish ndërkombëtarë nga Parlamenti Evropian.

Besimplotë se monitorimi sa më i gjerë ndërkombëtar dhe vendor i zgjedhjeve të ardhshme parlamentare i shërben cilësisë së procesit por edhe legjitimitetit të rezultatit të tyre, lutem pranoni, i nderuar Zoti Tajani, ndjenjat e konsideratës time më të lartë.

Ilir META

(M.D/Shuplaka)