Pak minuta pas manifestimit të presidentit Meta, që u zhvillua në Bulevardin dëshmorët e Kombit, qeveria e Edi Ramës, përmes zv.kryeministrit Erion Braçe, ka zgjedhur që të flasë me fjalët e ambasadores amerikane Yuri Kim.
Justifikimin e saj se SHBA-të nuk kishin lidhje me manifestimin, edhe pse u panë në të flamuj amerikanë, Braçe e cilëson shpullën e parë në drejtim të Metës.
Postimi i Braçes:
Shpulla e pare amerikane:
E SURPRIZUAR TE SHIHJA FLAMURIN AMERIKAN NE “MANIFESTIMIN” E SOTEM……. …….NUK KEMI TE BEJME FARE ME “MANIFESTIMIN” E SOTEM!
I referohet mitingut te Presidentit te Republikes.
Ashtu siç edhe e paralajmëroi zëdhënësi i tij Tedi Blushi, presidenti Meta ndërmorri sot në shesh së bashku me mijëra qytetarë që i ishin përgjigjur thirrjes së tij, tre akte.
I pari ishte kthimi pas i ligjit të kaluar në Kuvend për betimin e gjyqtarëve të Gjykatës Kushtetuese, hodhi në votim nëse turma donte që të shpërndante Kuvendin, dhe u betua në flamur, se do ta çonte deri në fund vullnetin e qytetarëve.
Meta tha se do të shpërndante Kuvendin në rast se mazhoranca nuk reflekton deri në datën 15 Mars, kur është dhe afati i palëve për Reformën Zgjedhore, që është dhe një kusht për negociatat e Shqipërisë.
Ishte turma ajo që iu përgjigj me ovacione të shumta thirrjes së Metës për shpërndarjen e Kuvendit.
Presidenti sfidoi mazhorancën kur tha se do të shkojë në Kuvend, për ta firmosur nga aty shpërndarjen e parlamentit, që prej kohësh nuk ka kuorumin që parashikon Kushtetuta, prej 140 deputetësh.
“Unë ju jap fjalën në emër të këtij flamuri, për të cilën janë vrarë mijëra dëshmorë, kur të përfundojë Reforma Zgjedhore, unë Ilir Meta betohem se atë dekret do ta firmos në mes të parlamentit, atje në mes të krimit, do i bëj thirrje popullit shqiptar, që unë i pari, do ta ndalim komunizmin”, u shpreh Meta.
“Zëri i popullit është zëri i Zotit, shqiponjat fluturojnë vetëm lart. Falenderimi më i përzemërt shkon për bashkëatdhetarët tanë që kanë ardhur nga e gjithë bota”, u shpreh më tej Meta.
(E.K/Faxweb.al)
