Kryetari i Kuvendit të Shqipërisë, Ilir Meta, ka shprehur urimet e tij për 9-vjetorin e pavarësisë së Kosovës në një mesazh urimi drejtuar kryetarit të Kuvendit të Kosovës, Kadri Veseli.
Në mesazhin e tij, Meta vlerëson mençurinë vizionare të Ibrahim Rrugovës dhe heronjtë e UÇK-së me në krye komandant Adem Jasharin.
Më tej, kryeparlamentari shqiptar shpreh mbështetjen e plotë të Kuvendit të Shqipërisë, duke mirëpritur vizitën zyrtare të Veselit të hënën në Tiranë.
Mesazhi i urimit të Ilir Metës:
I nderuar Zoti Kryetar,
Me rastin e 9 vjetorit të pavarësisë së Republikës së Kosovës më lejoni t’Ju përcjell urimet më të përzemërta dhe më të ngrohta në emër të Kuvendit të Shqipërisë.
Sot i gjithë kombi shqiptar kujton me mirënjohje të thellë të gjithë ata që sakrifikuan për pavarësinë e Kosovës, ndaj sot nderojmë me krenari, së bashku me të gjithë qytetarët e Kosovës, mençurinë vizionare të Presidentit Ibrahim Rrugova dhe përulemi me respekt të thellë ndaj heronjve të UÇK-së me Komandantin Adem Jashari në krye.
Sakrifica e pamasë e tyre na detyron të gjithëve të shumëfishojmë përpjekjet tona me qëllim që Shteti i Kosovës të ecë përpara në misionin kombëtar të shtimit të njohjeve ndërkombëtare, forcimit demokratik institucional dhe të avancimit në axhendën e sigurt euro-atlantike.
Në këtë drejtim, Ju siguroj për mbështetjen e plotë të Kuvendit të Shqipërisë, dhe duke mirëpritur vizitën Tuaj zyrtare ditën e hënë në Tiranë, unë besoj fort se ajo do të rikonfirmojë bashkëpunimin gjithnjë e më cilësor mes Tiranës dhe Prishtinës.
Duke Ju shprehur edhe një herë urimet e mia më të sinqerta, si dhe dëshirën për paqe, zhvillim e prosperitet për të gjithë qytetarët e Kosovës, Ju lutem pranoni, i nderuar z. Veseli, ndjenjat e konsideratës time më të lartë.
Discussion about this post