”Mbështetemi tek bashkëpunimi me SHBA. Marrëdhëniet me SHBA, të forcohen edhe më tej”, i ka thënë senatorit Roberts kreu i Kuvendit Ilir Meta, ndërsa senatori e ka siguruar se bashkëpunimi ndërmjet SHBA dhe Shqipërisë do të rritet në të ardhmen.
Gjatë vizitës së tij në Shtetet e Bashkuara të Amerikës, Meta u prit në një takim nga Pat Roberts, i cili është edhe kryetari i Komisionit për Agrikulturën të Senatit Amerikan.
Roberts vlerësoi bashkëpunimin ndërmjet Shteteve të Bashkuara të Amerikës dhe Shqipërisë duke nënvizuar se prezenca e Metës në SHBA kontribuon në ruajtjen dhe rritjen e këtyre marrëdhënieve.
“Është një privilegj që ju kemi sot këtu në një moment kaq të veçantë. Faleminderit që jeni pjesë e këtij eventi. Jeni shumë i mirëpritur. Ne besojmë se në të ardhmen bashkëpunimi ndërmjet dy vendeve do të jetë edhe më i ngushtë”, i tha Roberts-Metës.
Kryetari i Kuvendit e falënderoi senatorin Roberts për pritjen e tij duke nënvizuar se Shqipëria mbështetet fuqimisht tek bashkëpunimi i ngushtë me SHBA. “Ju falënderoj që më ftuat këtu dhe ne mbështetemi tek Shtetet e Bashkuara për të ardhmen e marrëdhënieve tona. Ne besojmë se marrëdhëniet tona do të jenë edhe më të forta dhe do të kemi një bashkëpunim edhe më të ngushtë në shumë fusha, edhe në atë të agrikulturës”, i shprehu mendimet e tij Meta.
Kreu i Kuvendit, njëkohësisht edhe kreu i LSI-së ndodhet në SHBA për të marrë pjesë në inagurimin e presidentit Donald Trump. (V.G/SHUPLAKA)
