Kreu i Kuvendit dhe kryetari i LSI-së Ilir Meta niset nesër drejt SHBA-ve ku do të marrë pjesë në inaugurimin e presidentit të 45-të amerikan, Donald Trump.
Burime pranë kryeparlamentarit kanë pohuar lajmin duke u shprehur: “Po është e vërtetë, nesër kryetari i Kuvendit do të niset për një vizitë në SHBA. Qëllimi i kësaj vizite është ftesa e mbërritur në adresë të Kreut të LSI-së, për të marrë pjesë në ceremoninë e inaugurimit të Presidentit të 45-të të SHBA-së, Donald Trump”.
Sipas burimeve për “Shuplakën”, gjatl vizitës së tij në SHBA, Ilir Meta do të takohet me drejtues të Kongresit dhe Senatit amerikan si dhe me zyrtarë të lartë të administratës aktuale dhe asaj të ardhme.
Të pranishëm në ceremoninë e inagurimit të Presidentit të SHBA-ve, Donald Trump, më 20 Janar, do të jenë edhe kryetari i PD-së Lulzim Basha, kryetari i PR-së Fatmir Mediu dhe dy deputetët socialistë, Ervin Bushati dhe Blendi Klosi, njëkohësisht ministër i Mirëqenies Sociale.
Bie në sy mungesa e kryeministrit Edi Rama, i cili nuk ka marrë asnjë ftesë nga Shtëpia e Bardhë. Rama gjatë zgjedhjeve presidenciale në SHBA doli hapur kundër Trump dhe pro kandidates demokrate Hillary Clinton. (A.R/SHUPLAKA)
Discussion about this post