Meta për Ramën: Jo vetëm policia por edhe mjekësia nuk i bën dot derman

Presidenti i zgjedhur Ilir Meta, në takimin përmbyllës të LSI-së në Berat, u ka bërë thirrje drejtorëve të Policisë së Shtetit, se nuk do të ketë asnjë amnisti, asnjë keqardhje, mëshirë, për ata që kërkojnë të kërcënojë qytetarët e Beratit, për votën e lirë. Madje tha duke nënkuptuar kryeministrin Rama, se jo policia, por as mjekësia nuk i bën dot derman.

“I bëj thirrje Policisë së Shtetit dhe të gjithë atyre që kanë ardhur me idenë për të marrë porosi nga dikush që jo vetëm policia por edhe mjekësia nuk i bën dot derman. Nuk do të ketë asnjë amnisti, asnjë keqardhje, mëshirë, për çdo drejtues policie, apo për çdo bandit që kërkon të kërcënojë qytetarët e Beratit, për votën e lirë.”, tha Meta.

Kujtojmë se një ditë më parë, LSI ka paditur në Prokurori kryeministrin Edi Rama. Kjo për shkak të deklaratave të tij ku i bënte thirrje Policisë së Shtetit që të angazhohej në fushatë.

Sipas LSI-së deklaratat e kryeministrit e tregojnë qartë se ai nuk gjendet në një situatë të qëndrueshme mendore dhe se duhet të bëhet kontrolli i tij mjekësor.

PJESË NGA FJALA E METËS

“Shqipëria do eci me drejtimin e ri, me LSI dhe me gjithë socialistët dhe demokratët e përgjegjshëm. Mediat italiane konfirmuan se LSI është gati për të drejtuar qeverisjen e vendit. Fitoren e shoh kudo, optimizmin në fytyrat tuaja, ashtu sikurse shoh panikun e atyre të cilët të trembur nga momenti i lirë i popuillit shqiptar, përpiqen t’i frikësohen në mënyrat më të turpshme.

Ne do fitojmë sepse ne jemi partia e rinisë së Shqipërisë, uragani i rinisë së Beratit dhe rinisë urbane. Ne do garantojmë votën e lirë të çdo shqiptari, jo vetëm për LSI-në. Ne nuk i ndërrojmë deputetët tanë siç i ndërrojnë të tjerët çdo katër vjetë. E keni vënë re? Pse i ndërrojnë? Sepse gënjejnë, mashtrojnë e nuk i voton më njeri, sepse thelbi i Rilindjes është vetëm gënjeshtra, pabesia dhe mosmbajtja e premtimeve. Ne jemi krenarë për deputetët tanë, ata janë të gjithë bio, nuk janë OMGJ.

Tani kam një lutje, nuk dua të dëgjoj më do marrim 3 apo katër, ne do marrim 5 deputetë dhe Tomit dhe Jerry-t do t’u lëmë vetëm ndonjë deputet sa për sy. Ne jemi socialist por edhe demokratë. Ne i duam të gjithë.

I bëj thirrje Policisë së Shtetit dhe të gjithë atyre që kanë ardhur me idenë për të marrë porosi nga dikush që jo vetëm policia por edhe mjekësia nuk i bën dot derman. Nuk do të ketë asnjë amnisti, asnjë keqardhje, mëshirë, për çdo drejtues policie, apo për çdo bandit që kërkon të kërcënojë qytetarët e Beratit, për votën e lirë. Forcë e parë, forcë e paparë.

Të gjithë drejt kutive të votimit më 25 qershor, e gjithë Shqipëria një million plusa për demokracinë, një million zemra. Rroftë populli i Beratit, rroftë rinia e Shqipërisë.”, tha Meta.