Bashkëkryetari i koalicionit qeverisës vlerësoi mbështetjen e reformës në drejtësi nga 140 deputët, që sipas tij është tregues i qartë se arritja e konsensusit është e realizueshme edhe në rastet kur duket mision i pamundur. Megjithatë Meta theksoi në konventën e LSI-së se do bëjë të pamundurën për t’i shkuar deri në fund kësaj reforme.
“Jemi krenarë që ishim pjesë e kësaj reforme që nga dita e parë e lancimit të idesë dhe deri në mesnatën e 21-22 korrikut, për të nxitur konsensusin. Me kalimin e kohës do të harrohen shumë gjëra, por do të mbahet mend që reforma u miratua me konsensus të plotë. Ne do të vazhdojmë të punojmë që paketa e ndryshimeve kushtetuese të hyjë sa më parë në fuqi. Do të bëjmë gjithçka që kjo reforma të vazhdojë pa u ndalur.”, deklaroi Meta.
Ai bëri thirrje që të lihen mënjanë dallimet partiake e të punohet në të mirë të vendit, për të rritur sigurinë juridike për të gjithë qytetarët dhe sipërmarrësit në vend.
Referuar arritjeve të kësaj qeveria, Meta përmendi ndër të tjera shlyerjen e borxhit të prapambetur ndaj sektorit privat dhe rritjen e ekonomisë. “Kthyem besimin tek financat publike. Shlyem borxhin dhe zhvilluam ekonominë. Rritja ekonomike pritet të jetë 3.5% këtë vit, nga 0.5% në 2013-ën. Fuqizuam sektorin privat dhe rritëm numrin e studentëve në arsimin profesional. Në 3 vite kemi arritje të prekshme. Të punojmë së bashku për ta bërë politikën mjet zhvillimi, shërbëtore transparente të interesave të publikut dhe një shans për të gjithë për një jetë më të mirë.”, tha më tej Meta.
Discussion about this post