Presidenti i Republikës, Ilir Meta priti sot në takim kryeministrin e Kosovës, Ramush Haradinajn. Në këtë takim, Meta dhe Haradinaj diskutuan për qeverinë e re të Kosovës.
Meta e uroi Haradinaj për detyrën e tij të rëndësishme si kryeministër i Republikës së Kosovës.
Nga ana tjetër, Meta shprehu angazhimin e tij për bashkëpunimin e ngushtë me institucionet e Kosovës, në interes të rritjes së mëtejshme të njohjeve ndërkombëtare si edhe forcimit të perspektivës evropiane.
Po ashtu, Meta theksoi rëndësinë e intensifikimit të mëtejshëm të shkëmbimeve ekonomike, tregtare, shkencore, arsimore, turistike, kulturore dhe të gjitha formave të tjera mes dy vendeve tona.
Një tjetër çështje për të cilën diskutuan Meta dhe Haradinaj ishte edhe dialogu i Serbisë me Kosovën, për të cilin Meta përshëndeti gatishmërinë e Kryeministrit Haradinaj qeverisë së re të Kosovës për vazhdimin e dialogut, si një proces pa alternativë dhe në funksion të paqes dhe stabilitetit të rajonit.
Meta theksoi rëndësinë e bashkëpunimit rajonal si një element kyç në promovimin e stabilitetit, sigurisë dhe paqes në gjithë rajonin, duke theksuar se Procesi i Berlinit është një mundësi e mirë për të rritur bashkëpunimin rajonal dhe përshpejtuar perspektivën tonë të përbashkët evropiane.
Marrëdhëniet e NATO-s me Kosovën, rëndësia e ruajtjes së një pranie substanciale të KFOR-it, për garantimin e një mjedisi të sigurt jo vetëm në Kosovë, por në të gjithë rajonin, ishin të tjera pika për të cilën Meta shprehu vlerësimin e tij. (D.D/Shuplaka)
Discussion about this post