Ditën e sotme, presidenti i Republikës, Ilir Meta, priti sot në një takim delegacionin e Universitetit të Pekinit për Gjuhët dhe Qytetërimet e Huaja (BFSU).
Në krye të këtij delegacioni ishte Rektori i këtij Universiteti, Prof. Long Peng. Meta përshëndeti vizitën e akademikëve kinezë në Shqipëri dhe duke vlerësuar bashkëpunimin shumë të mirë, të vendosur tashmë mes Universitetit prestigjioz të Pekinit dhe disa universiteteve shqiptare, shprehu besimin se ky bashkëpunim do të nxisë e rrisë më tej kontaktet e drejtpërdrejta mes të rinjve të të dy vendeve e për rrjedhojë do të ndihmojë në ruajtjen e forcimin e miqësisë mes dy popujve.
Nga ana tjetër, Meta vlerësoi kontributin e dhënë nga katedra e albanologjisë së Universitetit të Pekinit për Gjuhët dhe Qytetërimet e Huaja, në promovimin e gjuhës shqipe në Kinë, si edhe për mbështetjen e projekteve madhore për kulturën shqiptare, përmes botimit të një fjalori të përbashkët në të dy gjuhët, si dhe të botimit të një numri të konsiderueshëm veprash letrare e shkencore shqiptare në gjuhën kineze.
Një tjetër falenderim për Rektorin Peng shkon për shkak të bursave të studimeve universitare master dhe doktoraturë për të rinjtë nga Shqipëria. (D.D/Shuplaka)
Discussion about this post