Reagon për herë të parë Ilir Meta për protestën e demokratëve përpara Kryeministrisë.
”A keni koment për protestën e opozitës dhe ftesën e Berishës për qeverinë teknike?”, ka qenë pyetja e gazetarëve.
Megjithse Meta është munduar t’i shmanget përgjigjes, ai sërish e ka bërë një koment.
”Nuk dëshiroj të devijoj përmbajtjen e kësaj konference në çështje të brendshme aq më tepër të përfshij kryetarin e Kosovës në çështjet tona megjithatë mund të them që çdo protestë demokratike dhe qytetare është për t’u respektuar dhe çdo kërkesë brenda mundësive praktike që ekzistojnë është një kërkesë që meriton vlerësim dhe dialog. Kaq kisha”, theksoi kreu i LSI-së dhe njëkohësisht kreu i Kuvendit.
Menjëherë pas deklaratave zyrtare të tij dhe kryetarit të Kuvendit të Kosovës Kadri Veseli, gazetarët kanë patur padurim për ta pyetur për protestën, por Meta nuk ka hezituar të përsërisë këshillën e tij ”Me qetësi”.
”Me qetësi, meqënëse kemi përfaqësues të mediave të Kosovës dhe është pakicë do ia japim fjalën…”, u mundua t’i qetësojë gazetarët Meta.
”Hapat konkrete për ta zhbllokuar këtë situatë?”, ka qenë një tjetër pyetje drejtuar Metës.
”Opozita është këtu, se është parlamenti i të gjithëve edhe i opozitës, mos u shqetësoni se kjo nuk është konferenca e fundit për shtyp. Mos e mbajmë kryetarin Veseli në çështjet tona”, ka vazhduar më tej Meta duke zbuluar edhe axhendën e Veselit në protestën e demokratëve me fjalët: ”Do takohet edhe me Z.Basha dhe Z.Paloka, do takohen”
”Për sa i takon konsensusit këtu ne do ta mbrojmë Reformën në Drejtësi për të vazhduar përpara në mënyrën më të ndershme.”, tha më tej Meta gjatë konferencës së përbashkët me Veselin.
”Sigurisht nuk mund të rrinimin pa shprehur keqardhjen tonë për ndalimin e Ramush Haradinajt në Francë.”, u shpreh më tej Meta lidhur me çështjet që diskutoi me Kuvendin.
”Po diskutojmë për nivelin e ri të marrëdhënieve të dy kuvendeve tona. Njëkohësisht kemi vlerësuar edhe bashkëpunimin mes dy qeverive dhe punën e inspektoriatit Shqipëri-Kosovë. Po kështu kemi diskutar për të vazhduar shkëmbimin e eksperiencës integruese, europiane. Me këtë rast dua të theksoj mbështetjen tonë të plotë për realizimin e plotë të marrëveshjes së demarkacionit.”, tha më tej Meta duke shtuar se ka vlerësuar udhëheqjen e urtë të Kosovës për të mos rënë pre e murit të Mitrovicës, duke evituar konfliktet e panevojshme. (V.G/SHUPLAKA)
