Kryetari i LSI-së, Ilir Meta, ka zhvilluar një takim me strukturat e Njësisë Nr. 8 në Tiranë, ku ka folur për rëndësinë e votimit, që shqiptarët duhet të votojnë, por mbi të gjitha të zgjedhin.
Ai bëri me dije se do i jepet prioritet mendimit të çdo anëtari në të gjithë vendin për listat e kandidatëve për deputet.
“Ne besojmë se shqiptarët jo vetëm që duhet të votojnë, por mbi të gjitha duhet të zgjedhin, dhe të zgjedhin jo vetëm midis partive, por të kenë mundësi të zgjedhin brenda një force politike kandidatët që ata besojnë më shumë dhe që do të bëjnë më shumë për qytetarët në të ardhmen. LSI për listat që do të paraqesë për kandidatët për deputet do të kërkojë mendimin e çdo anëtari të saj kudo në të gjithë vendin. Në mënyrë që të gjithë të shprehen për kandidatët më të mirë dhe më të drejtë që do të përfaqësojnë më mirë interesat e qytetarëve shqiptarë. Të atyre që besojnë dhe votojnë për LSI-në dhe vlerat që ajo mbron, të cilët do të demonstrojnë një përkushtim më të madh për interesin publik dhe për interesin qytetar, të cilët do të shkojnë në Kuvendin e Shqipërisë për të mbrojtur interesat e qytetarëve dhe programin politik dhe qeverisës të Lëvizjes Socialiste për Integrim”, – u shpreh kreu i LSI-së. (XH.A/SHUPLAKA)
