Meta takime me krerët e partive shqiptare në Maqedoni, kokë më kokë edhe me Gruevskin

Presidenti i Republikës Ilir Meta zhvilloi disa takime të rëndësishme me krerët e partive shqiptare gjatë vizitës së tij në Maqedoni por njëkohësishte dhe një takim kokë më kokë Nikolla Gruevskin.

Meta u takua me kryetarin e BDI-së, Ali Ahmetin, me kreun e BESA-s Bilal Kasamin, me kryetarin e Aleancës për Shqiptarët, Zijadin Selën si dhe me kreun e PDSH-së Menduh Thaçin.

 Gjatë këtyre takimeve Presidenti Meta vuri në dukje dhe theksoi rolin kyç të faktorit politik shqiptar për harmoninë ndëretnike në Maqedoni si dhe nënvizoi rëndësinë që mbart bashkëpunimi dhe dialogu konstruktiv i të gjitha forcave politike për ardhmërinë dhe perspektivën integruese euro-atlantike të Maqedonisë.

Presidenti Meta, theksoi rëndësinë që ka bashkëpunimi i të gjithë faktorëve politikë në Maqedoni për integrimet euro-atlantike dhe sigurinë rajonale.

Gjithashtu Presidenti i Republikës zhvilloi një takim të veçantë edhe me kryetarin e opozitës maqedonase (VMRO-DPMNE), Nikolla Gruevski, gjatë të cilit theksoi rëndësinë që ka roli i  opozitës në të gjitha proceset eurointegruese të Maqedonisë.

(V.G/Faxweb)