Meta takon Tusk, mesazhi optimist: Shqipëria i ka të gjitha mundësitë për çeljen e negociatave

Gjatë qëndrimit në Shkup me rastin e samitit të Krerëve të Shteteve të Procesit të Brdo-Brijunit të Ballkanit Perëndimor, Presidenti i Republikës, Ilir Meta zhvilloi një takim me Presidentin e Këshillit Evropian, Donald Tusk.

Meta e konsideroi shumë të rëndësishme pjesëmarrjen e Presidentit Tusk në Samitin e Liderëve të Procesit të Brdo-Brijunit, shenjë e vëmendjes dhe mbështetjes gjithnjë e në rritje të BE-së ndaj Ballkanit Perëndimor.

Kreu i Shtetit gjithashtu vlerësoi vizitën dhe mesazhet inkurajuese që Presidenti Tusk përcolli gjatë vizitës së tij në Tiranë, të cilat duhet të nxitin të gjitha institucionet shqiptare drejt arritjeve konkrete në zbatim të 5 prioriteteve kyçe.

Presidenti Meta theksoi se ky do të ishte një moment oportun për të marrë përgjegjësi të reja dhe më angazhuese karshi qytetarëve shqiptarë dhe partnerëve evropianë.