Banorët e komunitetit rom në Gjirokastër kanë dalë sot në protestë, pasi pretendojnë se Bashkia e këtij qyteti është duke i diskriminuar për shkak të ngjyrës së tyre.
Gjithçka lidhet me një treg që vetë përfaqësuesit e këtij komuniteti kanë ndërtuar, për të cilën pretendojnë se kanë marrë miratimin e Flamur Golemit, por tashmë nuk lejohen që të tregtojnë më aty.
Përfaqësuesi i romëve pohon se ka hedhur 12 mijë euro për sheshin, nga ku tanimë Bashkia është duke i larguar, me një prani të madhe policësh bashkiakë.
Tregtarët romë shprehen se kjo është e vetmja mundësi e tyre për të qenë të punësuar, në mënyrë që të sigurojnë të ardhura për të ushqyer fëmijët e tyre.
“Ne këtu na merr të gjithëve, zotëria ka mbushur vendin, dhe i ka paguar të gjitha letrat, pse nuk e jep lejen, kryetari na tha vetë që të vinim këtu, dhe tani nuk firmos”, shprehet një prej banorëve të komunitetit, që më pas pretendojnë se do të bllokojnë qarkullimin në qytet me protestat e tyre.
“Pse e lejovi që në fillim, ka hedhur 10 milionë lekë këtu tjetri, ka shkuar që të marri kredi, kush do ia paguajë tani. Ku të shkojmë ne, jemi 200 familje, 150 familje, me këtë hamë bukë ne, t’ia kthejë bashkia paratë, t’ia vinte që në fillim shiritin bashkia pse e lejoi që ta bënte gati vendin, na kanë bërë si delet, dhe lopët. Kemi një muaj që nuk kemi se me çfarë ushqejmë fëmijët”, shprehet një tjetër tregtare rome.
Duke cituar kryebashkiakun Golemi, përfaqësuesi i komunitetit rom, u shpreh: Golemi më tha që ti hiqja arixhinjtë nga qafa, dhe ti mblidhja me një vend.
(E.K/Faxweb.al)
Discussion about this post