Mielli për prodhimin e bukës që vjen në vendin tonë nga Serbia prodhohet nga gruri që përdoret për kafshët. Niveli i proteinave të grurit është 10.5%, ndërsa standardi që duhet të ketë mielli për prodhimin e bukës duhet të ketë nivelin e proteinave 12%.
Adi Haxhiymeri, prodhues mielli, ka zbardhur sot problemet që ka buka që konsumojnë shqiptarët në emision “Të bësh ekonomi”.
“Proteina në miellin që përdoret për bukë është një shqetësim i ngritur nga më shumë se dy vjet, meqë standardet e prodhimit të miellit nuk ishin ndryshuar që nga koha e komunizmit. Ne kërkuam rritjen e standardit të cilësisë së miellit nga niveli i proteinave që ishte 7% dhe u vendos standardi i proteinës të jetë 12% për miellin për bukë. Këtu kemi të bëjmë në sigurinë ushqimore. Ne marrim proteinat nga buka, që është artikulli kryesor, që të bëhet bukë e mirë, gruri serb është 180 euro. Proteina në grurin serb arrin në 11% dhe në miell është shumë më e ulët. Që ta nxjerrin miellin më të bardhë, ulin rrezen dhe gjitha vlerat ushqimore ikin gjatë këtij procesi. Duke qenë gruri me 12%, mielli shkon në 10.5%, që është për kafshë, nuk ka asnjë vlerë”, u shpreh Haxhiymeri.
Mielli serb sipas tij hyn në Shqipëri, ose shitet në fshatra, përzihet në furrat e bukës që ulin kostot dhe fitojnë më tepër.
“Absurditeti në rast se në bursë gruri është 180 euro, mielli është 155 euro, nuk ka kuptim që nënprodukti të jetë më i lirë se lënda e parë. Dihet që ky miell nuk i prodhon standardet. Ne po prodhojmë me 40% kapacitet”, deklaroi Haxhiymeri. (M.D/ Shuplaka)
Discussion about this post