“Mini-Shengeni Ballkanik” ka zënë një hapësirë të gjerë në diskutimet politike në Rajon dhe nga ana tjetër ka nxjerrë në pah edhe qëndrimet e shumë njerëzve me ndikim të cilët e kanë kundërshtuar që në fillim këtë nismë të ndërmarrë nga Edi Rama, Aleksandër Vuçiç dhe Zoran Zaev.
Një nga zërat që është shprehur kundër saj është edhe Presidenti i Maqedonisë së Veriut, Stevo Pendarovski, i cili ka deklaruar se ka rezerva rreth kësaj ideje.
Pendarovski tha në emisionin “Përballë” të gazetarit Lutfi Dervishi se një alternativë mund të jetë rigjallërimi i marrëveshjes CEFTA (Central European Free Trade Agreement, është një marrëveshje e tregtisë së lirë në të cilën marrin pjesë tetë vende të rajonit të Ballkanit Perëndimor).
“Nëse Shengeni apo Mini-Shengeni, sido që ta quajmë, do të na ofrohet nga Brukseli si një lloj kompensimi në këmbim të anëtarësisë së plotë në BE, do të isha kundër kësaj ideje. Sepse e kam dëgjuar diçka të tillë nga disa cepa të shoqërisë europiane se EEA (zona europiane ekonomike) plus mini-shengeni mund të jenë një zëvendësues për anëtarësimin në BE. Duke patur parasysh këtë kontekst nga vendimi i fundit i Këshillit Europian, do të isha shumë i kujdesshëm për këtë çështje”, u shpreh Pendarovski.
(F.GJ/FAXWEB.AL)
Discussion about this post