Ministri grek i Mbrojtjes i përgjigjet Shqipërisë dhe Turqisë: Greqia nuk ka qenë kurrë luftënxitëse

Ministri grek i Mbrojtjes Panos Kamenos është tërhequr nga deklaratat e tij ku fliste për fuqinë ushtarake të shtetit Helen në raport me Shqipërinë dhe Turqinë.
“Greqia nuk ka qenë asnjëherë luftënxitëse. As tani nuk është. Këtë le ta dëgjojnë disa në Lindje, por edhe ata në kufijtë tanë veriorë”, është shprehur sot Kamenos.
Gjatë një aktiviteti në shkollën ushtarake të Greqisë, ministri grek u shpreh ndër të tjera se, Forcat e Armatosura te shtetit fqinj janë faktor që garantojnë unitetin dhe bashkimin e shtetit helen dhe janë të gatshme çdo ditë për të mbrojtur interesat e vendit dhe të drejtat e qytetarëve te saj.
Tre ditë më parë, Panos Kamenos, i veshur me rroba ushtarake dhe prane një fshati ne kufi me Shqipërinë, u shpreh se çamët kanë qenë bashkëpunëtorë të nazizmit dhe se deklaratat e kryeministrit shqiptar Edi Rama lidhur me këtë çështje janë për konsum të politikës shqiptare.
“Ka ikur koha e satrapëve”, ishte reagimi i homologes së tij shqiptare Mimi Kodheli.