Ministri i Jashtëm i Rusisë, Sergei Lavrov, i bëri thirrje Perëndimit që të mos ndërhyjë në përpjekjet për të pastruar provincën Idlb të Sirisë nga “terroristët”.
Komentet e tij për gazerarët në Moskë vijnë pas raporteve se forcat e Qeverisë siriane po përgatiten për një ofensivë masive në Idlib – bastionin e fundit të madh të rebelëve.
Rusia i ka dhënë presidentit sirian, Bashar al-Assad, mbështetje të madhe gjatë luftës civile, e cila, qysh në vitin 2011, ka lënë qindra-mijëra njerëz të vrarë dhe ka zhvendosur miliona të tjerë.
Rusia i ka kthyer zhvillimet në favor të Assadit kur ka nisur fushatën e sulmeve ajrore mbi kundërshtarët e tij në vitin 2015.
“Shpresoj se partnerët tanë ndërkombëtarë nuk do të bien pre e provokimeve (të rebelëve) dhe nuk do ta pengojnë operacionin anti-terror”, tha Lavrov.
SHBA mbështet forcat opozitare që luftojnë kundër Qeverisë së Assadit.
Turqia mbështet po ashtu rebelët, por jo gjithmonë të njëjtët që i mbështet Uashingtoni.
Lavrov tha se Moska ka qenë në kontakt me Turqinë dhe SHBA-në për situatën në Idlib.
Ai tha se ka “mirëkuptim të plotë politik” midis Moskës dhe Ankarasë, por nuk dha detaje.
Këtë javë, Shtetet e Bashkuara, Britania dhe Franca paralajmëruan sërish Sirinë që të mos përdorë armë kimike gjatë ofensivës në Idlib, duke thënë se një gjë e tillë do të nxiste hakmarrjen e Perëndimit.
Moska, në anën tjetër, ka akuzuar rebelët sirianë për planifikimin e një sulmi kimik në Idlib për të “provokuar” sulme nga Perëndimi./REL
Discussion about this post