Ministri i Jashtëm kinez Wang Yi, në një takim me homologun e tij danez Lars Loke Rasmussen sot në Pekin, deklaroi se Kina respekton plotësisht sovranitetin dhe integritetin territorial të Danimarkës kur bëhet fjalë për Groenlandën dhe i bëri thirrje atij vendi të ketë një qëndrim reciprok ndaj sovranitetit kinez.
Presidenti i SHBA-së, Donald Trump, ka këmbëngulur në muajt e fundit që SHBA-të duhet të marrin kontrollin e Groenlandës, një territor gjysmë-autonom danez që ka rëndësi strategjike.
Ministria e Jashtme kineze njoftoi se Wang tha se shpreson që Danimarka të vazhdojë të mbështesë qëndrimin legjitim të Kinës kur bëhet fjalë për çështjet që kanë të bëjnë me sovranitetin dhe integritetin territorial të Kinës.
Takimi midis dy palëve erdhi pasi Pekini kritikoi Danimarkën për pritjen e ish-presidentes tajvaneze Tsai Ing-wen javën e kaluar, e cila u takua me ligjvënës danezë dhe mbajti një fjalim në një samit për demokracinë në Kopenhagen.
Kina e pretendon Tajvanin si territor të saj, ndërsa qeveria tajvaneze hedh poshtë pretendimet territoriale të Pekinit.
Sipas agjencisë, marrëdhëniet midis Kinës dhe Danimarkës arritën pikën më të ulët në vitin 2009, kur Dalai Lama vizitoi Kopenhagenin.
