Rreth një muaj përpara testimit të arsimtarëve që kërkojnë të punësohen, Ministria e Arsimit ka publikuar programet orientuese për të interesuarit.
Mbi bazën e këtyre programeve, do të bëhet dhe përgatitja e kandidatëve.
Pa dhënë këtë provim, arsimtarët nuk do të mund të punësohen në shtet.
“Testimi i kandidatëve për ushtrimin e profesionit të mësuesit në sistemin arsimor parauniversitar do të zhvillohet në datën 21.01.2017, ora 10.00-12.30, në mjediset e planifikuara nga drejtoritë arsimore rajonale.”, bëhet me dije në udhëzimin e Ministrisë së Arsimit.
Emërimi i mësuesve do të bëhet përmes konkurrimit me tre faza në portalin “Mësues për Shqipërinë”. Në fazën e parë, nevojitet që kandidati të plotësojë 13 dokumente. Në rast mungese të ndonjë dokumentacioni, ai përjashtohet automatikisht.
Faza e dytë përfshin testimin e atyre që kualifikohen në fazën e parë. Pas testimit realizohet lista e kandidatëve për çdo profil/lëndë ku kandidatët do të listohen në bazë të pikëve të grumbulluara.
Në fazën e tretë dhe të fundit, bëhet përzgjedhja e fituesve, ku përparësi i jepet kandidatit me numër më të madh pikësh. Ai emërohet me kontratë individuale për një periudhë prove 1 vit, e cila miratohet nga Komisioni i Shërbimit Psiko-Social. Pas këtyre hapave, bëhet emërimi definitiv i mësuesit.
