Ministria e Brendshme do ofojë shërbime “security” me pagesë për subjekte publike apo private.
Kjo sipërmarrje shtetërore është firmosur sot me VKM nga Kryeministri Rama, ku urdhërohet krijimi i Shoqërisë “ILLYRIAN GUARD”, SH.A., me aksioner 100 për qind shtetin shqiptar.
“Shoqëria “Illyrian Guard”, sh.a., ofron shërbime me pagesë, kundrejt subjekteve të treta, publike apo private, në fushën e rendit e të sigurisë publike, teknologjisë së informacionit, si dhe çdo shërbim tjetër në përputhje me qëllimin e krijimit dhe statutin e saj“, thuhet në VKM.
Sipas VKM-së autoriteti publik që do të administrojë këtë shoqëri e cila së shpejti pritet të regjistrohet në QKB me kapitalin fillestar 10 milionë lekë është Ministria e Brendshme.
“Mënyra e përllogaritjes së tarifave të shërbimeve specifike, që u ofrohen subjekteve publike, përcaktohet me udhëzim të përbashkët të ministrit të Brendshëm dhe të ministrit të Financave dhe Ekonomisë.“, thuhet në VKM.
Në këtë të fundit sqarohet se të gjithë objektet publike do të duhet të kërkojnë shërbim nga kjo shoqëri duke mënjanuar kësisoj kompanitë private “security” të cilat deri më tani kanë ruajtur një pjesë të konsiderueshme të objekteve publike.
“Të gjitha institucionet dhe subjektet publike, të cilat kanë në administrim objekte shtetërore, ruajtja dhe sigurimi i të cilave duhet të realizohet nga shërbime të specializuara për këtë qëllim, i drejtohen, me kërkesë, kësaj shoqërie, për të përfituar shërbimin e ruajtjes dhe të sigurisë fizike. Nëse kjo shoqëri merr vendim për pamundësinë e ofrimit të shërbimit të kërkuar, institucionet dhe subjektet publike mund ta sigurojnë këtë shërbim në përputhje me legjislacionin përkatës në fuqi“, thuhet në vendim.(Faxweb.al)
Discussion about this post