Në ditën e gjashtë të grevës së urisë, Ministria e Energjisë dhe Industrisë i kthen një përgjigje grevistëve, lidhur me masat e marra për situatën në Zharrëz, pas lëkundjeve të shkaktuara nga kompania “Bankers Petroleum”.
Nëpërmjet një njoftimi për mediat, ky dikaster bën me dije se ka ngritur një grup pune me urdhër të Kryeministrit Rama që në dhjetor të 2016-ës, i cili do bëjë vlerësimin e situatës.
MASAT E MARRA
- Në vazhdim të urdhërit të lëshuar Ministrit te Energjise dhe Industrise për ndalimin e injektimit të ujit teknologjik në puset në gëlqerorë në Zharrëzes të datës 26.12.2016, MEI do t’i kërkojë kompanisë Bankers të ndalojë operacionet e injektimit të ujit në gëlqeror në zonën e Zharrëzës dhe të përdorë alternativa të tjera për trajtimin e ujit teknologjik pa dëmtuar mjedisin, si dhe masa riparuese të nëntokës dhe mbitokës, sipas standardeve ndërkombëtare, në mënyrë që të shmangen në të ardhmen pasojat negative për komunitetin.
- Drejtoria e Përgjithshme e Emergjencave Civile, në bashkëpunim me Institucionin e Prefektit të Qarkut Fier dhe me bashkinë Patos do të marrë masa të menjëhershme për sistemimin e përkohshëm të banorëve, banesat e të cilëve janë vlerësuar si të pabanueshme dhe riparimin e shtëpive me dëmtime të rënda, deri sa të konkludohet me pranim nga të dy palët, Qeveria dhe Bankers, përgjegjësia për shkaktimin e lëkundjeve sizmike, ose të disponohet një vendim i formës së prerë nga një palë e tretë e pranuar për zgjidhjen e mosmarrëveshjes apo nga arbitrazhi për këtë çështje.
- Albpetrol do të finalizojë blerjen dhe instalimin e 3 sizmomarrësve shtesë dhe 6 akseleromarrësve, si dhe pajiset përkatëse në bashkëpunim me IGJEUM.
- MEI do të angazhojë, në përputhje me parashikimet në Marrëveshjen Hidrokarbure dhe Liçencë Marrëveshjen për shfrytëzimin e vendburimit të Patos-Marinzes nga Bankers Petroleum, një ekspert teknik ndërkombëtar të pavarur për të përcaktuar në mënyrë objektive dhe asnjanëse shkakun e lëkundjeve, por edhe për të propozuar zgjidhjen më optimale për teknologjinë e trajtimit te ujit dhe mbetjeve teknologjike që shoqërojnë nxjerrjen e naftës nga nëntoka, sipas standardeve më të mira ndërkombëtare. (D.D/Shuplaka)
Discussion about this post