Ministria e Financave, e drejtuar nga ministrja teknike Helga Vukaj, po zhvillon një sërë kontrollesh në prag të zgjedhjeve të përgjithshme parlamentare të 25 qershorit.
Përmes një deklarate për mediat, kjo ministri bëri me dije se po inspekton në mënyrë intensive Degët Doganore, Drejtoritë Rajonale të Tatimeve dhe institucionet e tjera të varësisë.
Grupet e punës të ngritura për këtë qëllim janë fokusuar sot në inspektimin e sektorëve operacionalë të zonave doganore kufitare në juglindje të Shqipërisë, më konkretisht në Kapshticë, Goricë, Tushemisht dhe Qafë-Thanë.
Po kështu janë mbajtur nën mbikëqyrje edhe grupet e antikontrabandës të cilat operojnë në akset e këtyre zonave doganore.
Ato po të kontrollojnë nga afër zbatimin e detyrave funksionale nga punonjësit e doganave kufitare si dhe respektimin e rregullave që vendos VKM nr. 473, dt. 01.06.2017 për “Marrjen e masave dhe monitorimin e veprimtarisë, sjelljes apo përdorimit të burimeve njerëzore, financiare dhe logjistike të administratës shtetërore, gjatë procesit zgjedhor për zgjedhjet në Kuvendin e Shqipërisë për vitin 2017”.
Ministria e Financave u bën thirrje punonjësve të administratës fiskale që të kryejnë me përgjegjshmëri detyrat në përputhje me legjislacionin në fuqi.
(XH.A/SHUPLAKA)
Discussion about this post