Pak orë më parë u raportua se si pasojë e epidemisë së gripit, katët persona kanë humbur jetën në spitalin “Shefqet Ndroqi” në kryeqytet, por Ministria e Shëndetësisë ka sqaruar se bëhet fjalë për një numër më të vogël të viktimave.
Në njoftimin e ministrisë thuhet se dy persona të cilët vuanin nga sëmundje kronike, kanë humbur jetën në ambientet e këtij spitali, si pasojë e përkeqësimit nga gripi. Bëhet fjalë për dy të moshuar rreth moshës 70-vjeçare.
Njoftimi i plotë i ministrisë:
“Lidhur me raportimet sot në disa media për fatalitete si pasojë e epidemisë së gripit që po kalon vendi ynë, Ministria e Shëndetësisë informon se, aktualisht, janë vetëm dy raste të konfirmuara për persona që kanë ndërruar jetë, të cilët, përveç sëmundjeve të tjera, kanë rezultuar të prekur edhe nga virusi i gripit të stinës.
Të dhënat për këto dy raste janë si më poshtë:
K., mashkull, 70 vjeç, banues në Tiranë, shtruar më datë 31 Dhjetor 2016, në Spitalin Universitar “Shefqet Ndroqi,” me SPOK (Sëmundje Pulmonare Obstruktive Kronike) të riakutizuar, insufiçencë respiratore dhe status gripalis, ndërruar jetë më datë 2 Janar 2017.
N., mashkull, 71 vjeç, banues në Tiranë, shtruar më datë 3 janar 2017, po në Spitalin Universitar “Shefqet Ndroqi”, me sëmundje kardiovaskulare dhe insuficiencë respiratore, ndërruar jetë po atë ditë.” (D.D/Shuplaka)
