Ministrja Milva Ekonomi bën të ditur se qeveria duhet të marrë aksione të mëtejshme për të rritur konkurueshmërinë e produkteve shqiptare në tregun ballkanik.
Këtë deklaratë Ekonomi e bëri në Prishtinë, në një Konferencë të përbashkët me Ministren e Tregtisë dhe Industrisë të Republikës së Kosovës, Znj. Hykmete Bajrami.
“Kuptuam që duhet të bëjmë më tepër për të krijuar mundësi që produktet tona te jenë të konkurueshme në tregun ballkanik dhe atë europian dhe morëm përsipër aksione në të ardhmen në këtë drejtim. Gjithashtu, pamë me shumë kujdes mundësinë qe kemi për të hapur bashkëpunim në disa sektorë të rinj dhe në shkëmbimin e forcës së punës mes dy vendeve për aktivitete që janë shumë të rëndësishme për zhvillimin ekonomik mes dy vendeve.”, u shpreh Ekonomi. Sipas saj, nuk ka asnjë barrierë në shkëmbimet tregtare Shqipëri-Kosovë.
Ndërkohë Ministrja Bajrami konstatoi se janë 900 kompani me kapital nga Shqipëria që ushtrojnë aktivitetin në Kosovë që nga 2007. Ndërkohë 14 prej tyre kanë punësuar 1400 punëtorë në Kosovë.
Ministrja Ekonomi ndodhej në Prishtinë në kuadrin e Panairit të përbashkët Bli Shqip, i cili organizohet çdo vit nga Komuna e Prishtinës dhe MZHETTS, në kuadrin e festave kombëtare mbarëshqiptare.
