Ministrja për dialogun me Serbinë në qeverinë e Kosovës e ka quajtur të papranueshëm arrestimin e Ramush Haradinaj në Francë në një intervistë për ‘’Ora News’’. Sipas Ministres Tahiri kjo bie ndesh me dialogun e ndërtuar për shumë nga çështjet midis palëve.
Ajo gjithashtu i ka kërkuar ndërhyrje dhe palës shqiptare dhe sipas saj zëri zyrtar i Shqipërisë për këtë çështje duhet të dëgjohet më i lartë.
‘’BE duhet të përdorë mekanizmin e dialogut, duke i kërkuar Serbisë të heqë dorë menjëherë nga këto urdhër-arreste të çuditshme. Ministria e jashtme nga dje është në kontakte të rregullta me autoritetet franceze duke kërkuar lirimin e menjëhershëm të Haradinajt, dhe mos të gabohet duke marrë parasysh urdhër-arrestin serb. Që nga viti 2011 që kemi filluar dialogun, kemi kërkuar që kjo çështje të shtrohet në tryezën e diskutimit, që Serbia të heqë dorë nga këto praktika, mirëpo ajo nuk ka pranuar që të ulet në dialog. Kam ftuar institucionet e Kosovës të marrin masa reciproke.
Serbia e paraqet veten si një vend që transformohet në kuadër të europiznizimit, po ne në fakt kemi fakte që ajo nuk respekton marrëveshjet ndërkombëtare dhe vendimin e Hagës. BE dhe partnerët ndërkombëtarë duhet të merren seriozisht me Serbinë, përndryshe kjo marrëdhënie do të shndërrohet në rrezik për të gjithë rajonin.
Edhe Shqipëria duhet të ketë një reagim më të fortë pasi me takimet e shpeshta mes zyrtarëve Serbo-shqiptarë ky është një kanal i rëndësishëm komunikimi në raport me Serbinë. Edhe në këtë rast zëri i Shqipërisë duhet të tregohet më i qartë‘’, ka përfunduar ajo. (E.K/SHUPLAKA)
