Një debat në rrjetet sociale ka nisur mes Ministres Mirela Kumbaro dhe Auron Tares. Shkak për këtë është bërë një postim i Ministres ku prezantonte festivalin e veshjes së fustanellave.
Kumbaro, së bashku me drejtorin artistik të “Fustanella festival”, Robert Bishën, ka veshur një fund të bardhë pëlhure që e quan “fustanellë”.
“Marrëveshja për Fustanellën u arrit! Unë dhe Robert Bisha ramë dakord që Fustanella Festival do të mbahet në datë 19 – 20 – 21 MAJ, në Kalanë e Gjirokastrës. Fjalë burrash! Dhe grash!”, ka komentuar me krenari në Facebook ministrja e Kulturës pasi ka pozuar me një fund të bardhë të këtij festivali të veshur mbi teshat e veta para fotografisë së Azem e Shote Galicës.
Duke pozuar me qëllim promovimin e festivalit Bisha dhe Kumbaro kanë mbajtur të njëjtin qëndrim me atë të heronjve të kombit.
Pas postimit të kësaj veshjeje që ka qëllim promovimin e fustanellës, i pari që ka reaguar është Auron Tare, i organizatës për Mbrojtjen e Trashëgimisë Kulturore, i cili i drejtohet ministres në Facebook me këto fjalë:
“Më falni dhe ndjese për komentin, por duke qenë nga Labëria dhe si person që e respekton shumë fustanellën dhe e vesh atë edhe në vizita apo aktivitete jashtë Shqipërisë, më duhet të them se ajo që ju keni veshur mund të jetë gjithçka përveç se fustanellës. Ndoshta një fund grash i bardhë apo diçka tjetër. Faleminderit për mirëkuptimin.”
Po t’i drejtohemi enciklopedisë etnografike shkruhet se “fustanella është një veshje popullore burrash e trashëguar në vise te ndryshme të shqiptare në Jug e Veri.
Fustanella ka trajtën e një fundi shumë të gjerë, me shumë pala në formë trapezi, të qepura së bashku e të mbledhura me rrudha të dendura tek beli. Copa ishte pëlhure shtëpiake e bardhë prej pambuku e liri. Fustanella dokumentohet të jetë që nga shek IV – III para erës sonë, në disa gjetje arkeologjike”.
Etnografi hungarez, baroni Nopça, besonte se fustanella shqiptare apo ilire, ishte modeli mbi të cilin u ndërtua veshja ushtarake romake.
Discussion about this post