Minorenia nga Tirana seks me të dashurin fqinj por detyrohet ta denoncojë për përdhunim

Një e mitur 17-vjeçare ka menduar një mënyrë të pazakontë për të qenë pranë të dashurit të saj. Për të bindur nënën e saj që t’i lejonte të martohej me të dashurin ajo ka  shkuar në Prokurorinë e Tiranës dhe ka kallëzuar se ishte përdhunuar prej tij. Historia është regjistruar në gusht të vitit 2016, kohë kur e mitura B. Q., e shoqëruar nga e ëma, ka depozituar një kallëzim kundër fqinjit të saj.

Por vetëm dy ditë më vonë adoleshentja  ka shpjeguar para oficerëve të Policisë Gjyqësore se nuk ishte dhunuar seksualisht dhe se me djalin e kallëzuar kishte një lidhje dashurie disamujore. Megjithëse ka shpëtuar nga përgjegjësia penale të dashurin, ajo nuk mundi t’i shpëtojë përgjegjësisë së saj për kryerjen e veprës penale të “kallëzimit të rremë”, shkruan një portal online.

Sipas vendimit të Gjykatës, kallëzimi i minorenes është depozituar më 2 gusht 2016. Ajo ka rrëfyer se rreth orës 13:00 të asaj dite ajo ka qenë e vetme në shtëpi, kur në dhomë i është futur fqinji i saj, i cili ka kryer marrëdhënie seksuale me të, pa dëshirën e saj.

“Në vijim të hetimeve, e pyetur më datë 04.08.2016, e pandehura ka shpjeguar se kishte rreth 5 muaj që njihej me fqinjin, kishte kryer disa herë marrëdhënie seksuale me dëshirë me të dhe e dashuronin njëri-tjetrin.

Në lidhje me kallëzimin e paraqitur 2 ditë më parë, e pandehura ka shpjeguar se nuk ishte e vërtetë që shtetasi i kallëzuar kishte kryer marrëdhënie pa dëshirën e saj, por kishte paraqitur kallëzimin e rremë me qëllim që nëna e saj ta lejonte të martohej me të kallëzuarin”, thuhej në vendimin e Gjykatës.

Gjatë fazës së hetimit dhe gjatë gjykimit të çështjes, e pandehura ka mbajtur qëndrim pohues. Ajo ka pohuar se është martuar me shtetasin e kallëzuar prej saj dhe ka kërkuar një dënim sa më të butë. (J.V/Shuplaka)