Gjatë mbledhjes së sotme të Këshillit Bashkiak, u vendos që për vitin 2017 të ofrohen rreth 1.000 kredi të buta për familjet e reja apo në vështirësi ekonomike, për të mundësuar lehtësimin e strehimit të tyre.
Programi social i strehimit për “Subvencionimin e interesave të kredisë”, u miratua nga këshilltarët e PS-së, LSI-së dhe PDIU-së, ndërkohë që ata të PD-së u larguan nga mbledhja, pasi u konfliktuan më parë me kryebashkiakun Erion Veliaj.
“Sot kemi mbërritur në një produkt konkret që ka të bëjë me kreditë e buta. Është zhbllokim i një procesi që prej disa vitesh ishte pezulluar prej falimentit të bashkisë, prej faktit se shumë prej ish deputetëve dhe ish zëvendësministrave, ish zyrtarëve, abuzonin me kreditë e buta. Dua shumë që ky projekt të funksionojë sepse nëse funksionon, na mundëson që të vazhdojmë edhe vitin tjetër, edhe në të ardhmen”, tha Veliaj.
Sipas programit në fjalë, përfitues potencialë do të jenë individët apo familje me në përbërje çifte të reja, me synim përmirësimin e kushteve të cilësisë së jetesës së tyre. Për financimin e tij janë parashikuar shuma prej 95 milionë lekësh dhe masa e subvencionit të interesave të kredisë.
Ndërkohë, në mbledhjen e sotme u miratua gjithashtu vendimi për shpërndarjen e 1048 bursave për nxënësit në institucionet arsimore publike, si dhe për studentët në institucionet e arsimit të lartë publik për vitin shkollor 2016-2017. (D.D/Shuplaka)
