Është miratuar granti shtesë prej 112 000 eurosh për linjën hekurudhore Durrës-Tiranë. ‘’Fax news” zbardh përmbajtjen e tij.
Komisioni i çështjeve ligjore, Adminisatës publike dhe të drejtave të njeriut, ka miratuar një ditë më parë, projektligjin “Për ratifikimin e ndryshimit të marrëveshjes së grantit, ndërmjet këshillit të ministrave të republikës së shqipërisë, të përfaqësuar nga ministria e financave, dhe bankës evropiane për rindërtim dhe zhvillim, si administrator i fondeve grant, të siguruara nga qeveri të ndryshme nën fondin e përbashkët evropian të ballkanit perëndimor, për projektin e detajuar të linjës hekurudhore durrës – tiranë dhe vlerësimin financiar /ekonomik të të gjithë rrjetit hekurudhor në shqipëri, të ratifikuar me ligjin nr.63/2015”.
Sipas relatorit të këtij projekt ligji, Jurgis Cyrbja, nëpërmjet ndryshimeve të bëra synohet ratifikimi i ndryshimit të marrëveshjes së grantit, të lidhur ndërmjet Këshillit të Ministrave të Republikës së Shqipërisë, të përfaqësuar nga Ministria e Financave, dhe Bankës Evropiane për Rindërtim dhe Zhvillim, si administrator i fondeve grant, të siguruara nga qeveri të ndryshme nën Fondin e Përbashkët Evropian të Ballkanit Perëndimor, për financimin e projektit të detajuar të linjës hekurudhore Durrës-Tiranë dhe vlerësimin financiar/ekonomik të të gjithë rrjetit hekurudhor në Shqipëri, marrëveshje e cila është ratifikuar me ligjin nr.63/2015.
“Me anë të marrëveshjes së grantit, të lidhur më 13 mars 2015, është akorduar granti në vlerën prej 1 103 000 eurosh për financimin e projektit të detajuar të linjës hekurudhore Durrës – Tiranë, “Terminali i transportit publik (PTT), lidhjes së re hekurudhore me Aeroportin e Rinasit (TIA)” si dhe vlerësimi ekonomiko-financiar i të gjithë rrjetit hekurudhor shqiptar.
Ndryshimi i marrëveshjes së grantit i propozuar për ratifikim ka për qëllim financimin e projektit konceptual për rehabilitimin e linjës hekurudhore në seksionin “Terminali i transportit publik Tiranë (PTT) deri te stacioni i trenit Tiranë”.
Rehabilitimi i këtij seksioni është menduar të realizohet si shtesë e projektit për rehabilitimin e linjës hekurudhore Durrës – Tiranë (PTT) dhe ndërtimin e lidhjes së re hekurudhore me Aeroportin Ndërkombëtar të Tiranës”, thuhet ndër të tjera në përmbajtjen e këtij projekt ligji, relatuar dje në komision nga Cyrbja.
Ky rehabilitim dhe ndërtimi i linjës së re hekurudhore me Rinasin synon modernizimin e saj nëpërmjet përmirësimit të karakteristikave të linjës hekurudhore në përputhje me standardet e Bashkimit Evropian, me qëllim rritjen e efikasitetit dhe sigurisë së transportit hekurudhor të mallrave e të udhëtarëve ndërmjet Tiranës, Durrësit dhe aeroportit të Rinasit.
Sipas marrëveshjes së grantit, të ratifikuar me ligjin nr. 63/2015 shuma disponibël për kryerjen e shërbimeve të konsulencës ishte deri në vlerën 1 103 000.00 euro, që është dhe vlera me të cilën u lidh kontrata përkatëse.
Meqenëse vlera fillestare e grantit të akorduar nga ishte 1 215 000.00 euro, granti shtesë prej 112 000 eurosh që do të akordohet nga BERZH-i, do të mund të përdoret për financimin e projektit konceptual për seksionin hekurudhor “Terminali i transportit publik Tiranë (PTT) – stacioni i trenit Tiranë”.
Projekti është pjesë e parashikimeve buxhetore të Ministrisë së Infrastrukturës dhe Energjisë, konkretisht në programin “Transporti hekurudhor” për parashikimin e vlerës së TVSH-së, 22 400.00 euro, me kontribut buxhetor.
Discussion about this post