Miratohet “Kodi i Sjelljes së Deputetëve”, Balla: Patëm ”ok”-in e vetëm njërit prej grupeve Parlamentare të opozitës

Taulant Balla nga mbledhja e Konferencës së Kryetarëve ka njoftuar miratimin e Kodit të Sjelljes së deputetëve.

Sipas tij kjo do të sjellë rregullimin e standardeve të Kuvendit, ndërsa deputetët do të jenë më të përgjegjshëm përpara qytetarëve.

“Konferenca e Kryetarëve vendosi miratimin e Kodit të sjelljeve nga ana e deputetëve. Miratimi I këtij akti rregullator do t’i shërbejë jo vetëm deputetëve por edhe rregullimit të standardeve në sytë e opinionit public dhe të qytetarëve.

Në këtë mënyrë ne japim llogari para qytetarëve sesi po veprojmë në lidhje me besimin që ata na kanë dhënë. Duhet të ketë një transparencë edhe sesi ne menaxhojmë financat. KJo është një përpjekje dhe për të luftuar korrupsionin. Nuk mund të jetë efektive nëse nuk i kemi të qarta rregullat dhe standardet. Kjo mund të ndihmojë për të parandaluar fenomenin e shpërdorimit të detyrës në këto 27-vitet e fundit. Për shkak të pozicionit të veçantë ne na duhet të zgjedhim mes interesave kombëtare, të zonës nga vijmë dhe nga interesat personale.

Deputeti nuk mund të marrë pjesë në aktivitete të biznesit, marrja e dhuratave është gjithashtu mjaft problematike për deputetët. Komunitetet me të drejtë kanë pritshmëri të larta në lidhje me performancën e deputetëve, dhe ne do tiu japim atyre më shumë akses. Patëm dakordësi vetëm nga njëri prej grupeve opozitare që ishin të pranishme në mbledhje”, u shpreh Balla.

(E.K/SHUPLAKA)