Britania aprovon lindjen e bebeve nga tre prindër. BBC ka publikuar lajmin duke theksuar se risia është miratuar nga Rregullatori i Fertilitetit të Britanisë së Madhe. Ky hap historik dhe i diskutueshëm, bëhet për të parandaluar fëmijët që të lindin me sëmundje gjenetike vdekjeprurëse.
Fëmija i parë i kësaj metode, mund të lindë në fund të vitit 2017. “Është një vendim me rëndësi historike”, tha Sally Cheshire, kryetare e Autoritetit të Fekondimit dhe Embriologjisë Njerëzore (HFEA). Teknika që mundëson përdorimin e ADN-së së 3 prindërve është një hap revolucionar sa i përket riprodhimit njerëzor.
Bëhet fjalë për një teknologji të re, e para në historinë e njerëzimit që mundëson lindjen e një njeriu të shëndetshëm nga 2 vezë të rikombinuara me spermën e një personi. Procedura e shumë diskutuar parashikon ndërhyrjen në procesin e fertilizimit për të zhvendosur mitokondrinë, e cila vepron si një bateri e vogël që gjeneron energji brenda qelizës. ADN-ja mitokondriale është e ndarë nga ADN-ja në bërthamën qelizore dhe nuk prek karakteristika të tilla si flokët, ngjyra e syve, pamja apo karakteristika te personalitetit.
